ਖੁੰਖਾਰ ਕੁੱਤਿਆਂ ਨੇ ਪੱਬੀਆਂ ਪਿੰਡ ਵਿੱਚ ਬਿਹਾਰੀ ਮਜ਼ਦੂਰ ਨੂੰ ਨੋਚ ਖਾਧਾ

)ਜਗਰਾਓਂ ਦੇ ਨੇੜਲੇ ਪੱਬੀਆਂ ਪਿੰਡ ਵਿੱਚ, ਬਿਹਾਰ ਦੇ ਇੱਕ 50 ਸਾਲਾ ਮਜ਼ਦੂਰ ਨੂੰ ਰਾਤ ਦੇ ਸਮੇਂ ਖੇਤ ਦੀ ਮੋਟਰ ’ਤੇ ਹੱਡਾ ਰੋੜੀ ਦੇ ਖੁੰਖਾਰ ਕੁੱਤਿਆਂ ਨੇ ਨੋਚ ਖਾਧਾ, ਜਿਸਦੇ ਮੌਕੇ ’ਥੇ ਹੀ ਮੌਤ ਹੋ ਗਈ। ਇਹ ਘਟਨਾ ਮੰਗਲਵਾਰ ਦੇਰ ਰਾਤ ਵਾਪਰੀ ਅਤੇ ਮਜ਼ਦੂਰ ਦੀ ਲਾਸ਼ ਬੁੱਧਵਾਰ ਸਵੇਰੇ ਖੇਤਾਂ ਵਿੱਚੋਂ ਮਿਲੀ। ਕੁੱਤਿਆਂ ਨੇ ਉਸਦੀ ਗਰਦਨ ਅਤੇ ਚਿਹਰੇ ਨੂੰ ਬੁਰੀ ਤਰ੍ਹਾਂ ਨੋਚ ਲਿਆ। ਮ੍ਰਿਤਕ ਦੀ ਪਛਾਣ ਰਮੇਸ਼ ਮੰਡਲ (ਪੁੱਤਰ ਜਗੇਸ਼ਵਰ) ਵਜੋਂ ਹੋਈ ਹੈ, ਜੋ ਕਿ ਬਿਹਾਰ ਦੇ ਪੂਰਨੀਆ ਜ਼ਿਲ੍ਹੇ ਦੇ ਮਾਨਕਨਾਹਾ ਦਾ ਰਹਿਣ ਵਾਲਾ ਹੈ। ਹਰ ਸਾਲ ਵਾਂਗ, ਉਹ ਆਪਣੇ ਸਾਥੀਆਂ ਨਾਲ ਪੱਬੀਆਂ ਪਿੰਡ ਦੇ ਇੱਕ ਕਿਸਾਨ ਹਰਬੰਸ ਸਿੰਘ ਦੇ ਖੇਤਾਂ ਵਿੱਚ ਝੋਨਾ ਲਗਾਉਣ ਆਇਆ ਸੀ। ਉਹ ਆਪਣੇ ਸਾਥੀ ਕਰਮਚਾਰੀਆਂ ਨਾਲ ਖੇਤ ਦੇ ਟਿਊਬਵੈੱਲ ਦੇ ਕਮਰੇ ਵਿੱਚ ਰਹਿ ਰਿਹਾ ਸੀ। ਚੌਕੀਮਾਨ ਪੁਲਿਸ ਚੌਕੀ ਦੇ ਇੰਚਾਰਜ ਏਐਸਆਈ ਸੁਖਮੰਦਰ ਸਿੰਘ ਨੇ ਦੱਸਿਆ ਕਿ ਰਮੇਸ਼ ਅਤੇ ਉਸਦੇ ਸਾਥੀ ਉਸ ਰਾਤ ਟਿਊਬਵੈੱਲ ਕਮਰੇ ਦੀ ਛੱਤ ’ਤੇ ਸੌਂ ਰਹੇ ਸਨ। ਦੇਰ ਰਾਤ, ਰਮੇਸ਼ ਨੂੰ ਇੱਕ ਫ਼ੋਨ ਆਇਆ; ਉਹ ਹੇਠਾਂ ਉਤਰਿਆ ਅਤੇ ਗੱਲ ਕਰਨ ਲਈ ਖੇਤਾਂ ਵੱਲ ਤੁਰ ਪਿਆ। ਇਸ ਦੌਰਾਨ ਖੇਤਾਂ ਵਿਚ ਉਸਨੂੰ ਲਗਭਗ 8-10 ਖੁੰਖਾਰ ਕੁੱਤਿਆਂ ਦੇ ਇੱਕ ਝੁੰਡ ਨੇ ਘੇਰ ਕੇ ਹਮਲਾ ਕਰ ਦਿੱਤਾ। ਉਸਦੇ ਸਾਥੀ ਛੱਤ ’ਤੇ ਸੁੱਤੇ ਹੋਏ ਸਨ, ਉਹ ਡੂੰਘੀ ਨੀਂਦ ਵਿੱਚ ਸਨ ਅਤੇ ਉਸਦੀ ਚੀਕ ਪੁਕਾਰ ਨਹੀਂ ਸੁਣ ਸਕੇ। ਕੁੱਤਿਆਂ ਨੇ ਉਸਦੇ ਮੂੰਗ, ਗਰਦਨ ਸਮੇਤ ਹੋਰ ਕਈ ਹਿੱਸਿਆਂ ’ਤੇ ਬਰੀ ਤਰ੍ਹਾਂ ਨਾਲ ਉਸਨੂੰ ਨੋਚ ਲਿਆ। ਜਿਸ ਕਾਰਨ ਉਸਦੀ ਮੌਕੇ ’ਤੇ ਹੀ ਮੌਤ ਹੋ ਗਈ।

ਜਦੋਂ ਉਸਦੇ ਸਾਥੀ ਸਵੇਰੇ ਉੱਠੇ, ਤਾਂ ਰਮੇਸ਼ ਮੰਡਲ ਉੱਥੇ ਨਹੀਂ ਸੀ। ਉਸਦੀ ਭਾਲ ਕਰਨ ’ਤੇ, ਉਨ੍ਹਾਂ ਨੂੰ ਉਸਦੀ ਲਾਸ਼ ਖੇਤਾਂ ਵਿੱਚ ਪਈ ਮਿਲੀ, ਬੁਰੀ ਤਰ੍ਹਾਂ ਕੁੱਤਿਆਂ ਵਲੋਂ ਨੋਚੀ ਹੋਈ ਸੀ। ਉਨ੍ਹਾਂ ਵਲੋਂ ਪੁਲਿਸ ਨੂੰ ਤੁਰੰਤ ਸੂਚਿਤ ਕੀਤਾ ਗਿਆ। ਚੌਕੀਮਾਨ ਪੁਲਿਸ ਚੌਕੀ ਦੇ ਇੰਚਾਰਜ ਏਐਸਆਈ ਸੁਖਮੰਦਰ ਸਿੰਘ ਪੁਲਿਸ ਟੀਮ ਨਾਲ ਮੌਕੇ ’ਤੇ ਪਹੁੰਚੇ। ਪੁਲਿਸ ਨੇ ਲਾਸ਼ ਨੂੰ ਕਬਜ਼ੇ ਵਿੱਚ ਲੈ ਲਿਆ, ਬੀਐਨਐਸ (ਭਾਰਤੀ ਨਿਆ ਸੰਹਿਤਾ) ਦੀ ਧਾਰਾ 194 ਤਹਿਤ ਕਾਰਵਾਈ ਸ਼ੁਰੂ ਕੀਤੀ, ਅਤੇ ਲਾਸ਼ ਪਰਿਵਾਰ ਨੂੰ ਸੌਂਪ ਦਿੱਤੀ। ਇਹ ਧਿਆਨ ਦੇਣ ਯੋਗ ਹੈ ਕਿ ਕੁਝ ਸਮਾਂ ਪਹਿਲਾਂ, ਇਸੇ ਪਿੰਡ ਦੇ ਇੱਕ 6-7 ਸਾਲ ਦੇ ਬੱਚੇ ਨੂੰ ਵੀ ਕੁੱਤਿਆਂ ਨੇ ਬੁਰੀ ਤਰ੍ਹਾਂ ਵੱਢ ਦਿੱਤਾ ਸੀ; ਬੱਚੇ ਨੂੰ ਜਗਰਾਉਂ ਦੇ ਸਰਕਾਰੀ ਹਸਪਤਾਲ ਵਿੱਚ ਅਤੇ ਬਾਅਦ ਵਿੱਚ ਫਰੀਦਕੋਟ ਦੇ ਹਸਪਤਾਲ ਵਿੱਚ ਗੰਭੀਰ ਹਾਲਤ ਵਿੱਚ ਦਾਖਲ ਕਰਵਾਇਆ ਗਿਆ ਸੀ।