ਗੋਆ-ਯੂਪੀ ਵਿੱਚ ਭਾਜਪਾ ਨੂੰ ਹਰਾਓ, ਤਾਂ ਹੀ ਈ-20 ਵਾਪਸ ਲਵੇਗੀ ਮੋਦੀ ਸਰਕਾਰ- ਕੇਜਰੀਵਾਲ

Aug25,2026 | Jagrati Lahar Bureau | New Delhi/goa

ਇਹਨਾਂ ਨੂੰ ਹੰਕਾਰ ਹੈ ਕਿ ਜਨਤਾ ਕਿੱਥੇ ਜਾਵੇਗੀ, ਜਿੱਤਣਾ ਤਾਂ ਭਾਜਪਾ ਨੇ ਹੀ ਹੈ, ਇਹ ਹੰਕਾਰ ਤੋੜਨਾ ਪਵੇਗਾ- ਕੇਜਰੀਵਾਲ

ਭਾਰਤ ਵਿੱਚ 80 ਫੀਸਦੀ ਵਾਹਨ ਈ-20 ਦੀ ਵਰਤੋਂ ਦੇ ਯੋਗ ਨਹੀਂ, ਫਿਰ ਵੀ ਸਰਕਾਰ ਧੱਕੇ ਨਾਲ ਇਸ ਨੂੰ ਥੋਪ ਰਹੀ ਹੈ- ਕੇਜਰੀਵਾਲ

ਗੰਨੇ ਤੋਂ ਈਥਾਨੌਲ ਬਣਾਉਣ ਨਾਲ ਦੇਸ਼ ਵਿੱਚ ਖੰਡ ਦੀ ਘਾਟ ਹੋ ਗਈ ਹੈ, 30 ਰੁਪਏ ਪ੍ਰਤੀ ਕਿੱਲੋ ਤੱਕ ਭਾਅ ਵਧ ਗਏ ਹਨ- ਕੇਜਰੀਵਾਲ

ਭਾਜਪਾ ਦੇ ਲੋਕ ਅਨਪੜ੍ਹ ਹਨ, ਇਹ ਨਾ ਕੋਈ ਸਟੱਡੀ ਕਰਵਾਉਂਦੇ ਹਨ ਅਤੇ ਨਾ ਹੀ ਕਿਸੇ ਸਟੱਡੀ ਨੂੰ ਮੰਨਦੇ ਹਨ- ਕੇਜਰੀਵਾਲ

ਜਿਵੇਂ ਹੀ ਈ-20 ਦਾ ਮੁੱਦਾ ਸ਼ਾਂਤ ਹੋਵੇਗਾ, ਇਹ ਲੋਕ ਈ-30 ਲਿਆਉਣਗੇ ਅਤੇ ਡੀਜ਼ਲ ਵਿੱਚ ਵੀ ਈਥਾਨੌਲ ਮਿਲਾਉਣਗੇ- ਕੇਜਰੀਵਾਲ

ਆਪ’ ਦੇ ਰਾਸ਼ਟਰੀ ਕਨਵੀਨਰ ਅਰਵਿੰਦ ਕੇਜਰੀਵਾਲ ਨੇ ਗੋਆ ਦੇ ਮਿਰਾਮਾਰ ਵਿੱਚ ਈ-20 ਦੇ ਖਿਲਾਫ ਕੀਤਾ ਟਾਊਨਹਾਲ

ਨਵੀਂ ਦਿੱਲੀ, 25 ਅਗਸਤ 2026

ਆਮ ਆਦਮੀ ਪਾਰਟੀ ਦੇ ਰਾਸ਼ਟਰੀ ਕਨਵੀਨਰ ਅਰਵਿੰਦ ਕੇਜਰੀਵਾਲ ਨੇ ਮੰਗਲਵਾਰ ਨੂੰ ਗੋਆ ਦੇ ਮਿਰਾਮਾਰ ਵਿੱਚ ਈ-20 ਦੇ ਖਿਲਾਫ ਟਾਊਨਹਾਲ ਕਰਕੇ ਮੋਦੀ ਸਰਕਾਰ ਉੱਤੇ ਨਿਸ਼ਾਨਾ ਸਾਧਿਆ। ਉਹਨਾਂ ਨੇ ਕਿਹਾ ਕਿ ਮੋਦੀ ਸਰਕਾਰ ਇੰਨੀ ਆਸਾਨੀ ਨਾਲ ਈ-20 ਵਾਪਸ ਨਹੀਂ ਲੈਣ ਵਾਲੀ। ਇਸ ਦੇ ਲਈ ਭਾਜਪਾ ਨੂੰ ਗੋਆ ਅਤੇ ਉੱਤਰ ਪ੍ਰਦੇਸ਼ ਵਿੱਚ ਹਰਾਉਣਾ ਪਵੇਗਾ। ਕਿਉਂਕਿ ਇਹਨਾਂ ਨੂੰ ਹੰਕਾਰ ਹੋ ਗਿਆ ਹੈ ਕਿ ਜਨਤਾ ਕਿੱਥੇ ਜਾਵੇਗੀ, ਜਿੱਤਣਾ ਤਾਂ ਭਾਜਪਾ ਨੇ ਹੀ ਹੈ। ਇਹਨਾਂ ਦਾ ਇਹ ਹੰਕਾਰ ਤੋੜਨਾ ਪਵੇਗਾ। ਜੇਕਰ ਇਹਨਾਂ ਦੋਵਾਂ ਰਾਜਾਂ ਵਿੱਚ ਭਾਜਪਾ ਹਾਰ ਗਈ ਤਾਂ ਮੋਦੀ ਸਰਕਾਰ 5 ਦਿਨਾਂ ਦੇ ਅੰਦਰ ਈ-20 ਵਾਪਸ ਲੈ ਲਵੇਗੀ। ਉਹਨਾਂ ਕਿਹਾ ਕਿ ਭਾਰਤ ਵਿੱਚ 80 ਫੀਸਦੀ ਵਾਹਨ ਈ-20 ਦੀ ਵਰਤੋਂ ਦੇ ਯੋਗ ਨਹੀਂ ਹਨ। ਫਿਰ ਵੀ ਸਰਕਾਰ ਧੱਕੇ ਨਾਲ ਇਸ ਨੂੰ ਥੋਪ ਰਹੀ ਹੈ। ਭਾਜਪਾ ਦੇ ਲੋਕ ਅਨਪੜ੍ਹ ਹਨ। ਇਹ ਨਾ ਕੋਈ ਸਟੱਡੀ ਕਰਵਾਉਂਦੇ ਹਨ ਅਤੇ ਨਾ ਹੀ ਕਿਸੇ ਸਟੱਡੀ ਨੂੰ ਮੰਨਦੇ ਹਨ। ਜਿਵੇਂ ਹੀ ਈ-20 ਦਾ ਮੁੱਦਾ ਸ਼ਾਂਤ ਹੋਵੇਗਾ, ਇਹ ਲੋਕ ਈ-30 ਲਿਆਉਣਗੇ ਅਤੇ ਡੀਜ਼ਲ ਵਿੱਚ ਵੀ ਈਥਾਨੌਲ ਮਿਲਾਉਣਗੇ।

ਗੋਆ ਵਿੱਚ ਆਯੋਜਿਤ ਟਾਊਨਹਾਲ ਵਿੱਚ ਈ-20 ਨੂੰ ਲੈ ਕੇ ਲੋਕਾਂ ਦੇ ਤਜ਼ਰਬਿਆਂ ਨੂੰ ਸੁਣਨ ਤੋਂ ਬਾਅਦ ਅਰਵਿੰਦ ਕੇਜਰੀਵਾਲ ਨੇ ਕਿਹਾ ਕਿ ਈ-20 ਨਾਲ ਲਗਭਗ ਸਾਰੀਆਂ ਗੱਡੀਆਂ ਦੀ ਮਾਈਲੇਜ 30 ਤੋਂ 40 ਫੀਸਦੀ ਘੱਟ ਗਈ ਹੈ ਅਤੇ 60 ਤੋਂ 70 ਫੀਸਦੀ ਗੱਡੀਆਂ ਦੇ ਇੰਜਣ ਅਤੇ ਫਿਊਲ ਟ੍ਰਾਂਸਮਿਸ਼ਨ ਸਿਸਟਮ ਖਰਾਬ ਹੋ ਰਹੇ ਹਨ। ਇਹ ਸਮੱਸਿਆ ਸਿਰਫ ਗੋਆ ਦੀ ਨਹੀਂ ਹੈ, ਬਲਕਿ ਪੂਰੇ ਦੇਸ਼ ਵਿੱਚ ਲੋਕ ਇਸ ਦੇ ਖਿਲਾਫ ਆਵਾਜ਼ ਉਠਾ ਰਹੇ ਹਨ। ਪਰ ਪਤਾ ਨਹੀਂ ਕਿਹੜੇ ਕਾਰਨਾਂ ਕਰਕੇ ਪ੍ਰਧਾਨ ਮੰਤਰੀ ਦੇਸ਼ ਦੇ ਲੋਕਾਂ ਦੀ ਗੱਲ ਨਹੀਂ ਸੁਣ ਰਹੇ ਹਨ।

ਅਰਵਿੰਦ ਕੇਜਰੀਵਾਲ ਨੇ ਦੱਸਿਆ ਕਿ ਈ-20 ਪੈਟਰੋਲ ਨਾਲ ਗੋਆ ਸਭ ਤੋਂ ਜ਼ਿਆਦਾ ਪ੍ਰਭਾਵਿਤ ਹੈ, ਕਿਉਂਕਿ ਇੱਥੇ ਦੋ-ਪਹੀਆ ਅਤੇ ਚਾਰ-ਪਹੀਆ ਵਾਹਨਾਂ ਦੀ ਗਿਣਤੀ ਪੂਰੇ ਦੇਸ਼ ਵਿੱਚ ਸਭ ਤੋਂ ਜ਼ਿਆਦਾ ਹੈ। ਗੋਆ ਵਿੱਚ 87 ਫੀਸਦੀ ਪਰਿਵਾਰਾਂ ਕੋਲ ਦੋ-ਪਹੀਆ ਅਤੇ 47 ਫੀਸਦੀ ਪਰਿਵਾਰਾਂ ਕੋਲ ਚਾਰ-ਪਹੀਆ ਵਾਹਨ ਹਨ, ਜੋ ਰਾਸ਼ਟਰੀ ਔਸਤ ਤੋਂ ਕਿਤੇ ਜ਼ਿਆਦਾ ਹੈ। ਕੁਝ ਲੋਕਾਂ ਨੂੰ ਗਲਤਫਹਿਮੀ ਹੈ ਕਿ ਗੋਆ ਵਿੱਚ ਈ-20 ਲਾਗੂ ਨਹੀਂ ਹੋਇਆ ਹੈ। ਅਸਲ ਵਿੱਚ 1 ਅਪ੍ਰੈਲ 2026 ਤੋਂ ਪੂਰੇ ਦੇਸ਼ ਦੇ ਹਰ ਪੈਟਰੋਲ ਪੰਪ ਉੱਤੇ ਸਿਰਫ ਈ-20 ਪੈਟਰੋਲ ਹੀ ਮਿਲ ਰਿਹਾ ਹੈ ਅਤੇ ਸ਼ੁੱਧ ਪੈਟਰੋਲ ਉਪਲਬਧ ਨਹੀਂ ਹੈ। ਗੋਆ ਦੇ ਪੈਟਰੋਲ ਪੰਪਾਂ ਉੱਤੇ ਲੋਕ ਜੋ ਪੈਟਰੋਲ ਭਰਵਾ ਰਹੇ ਹਨ, ਉਹ ਈ-20 ਹੀ ਹੈ, ਇਸੇ ਵਜ੍ਹਾ ਨਾਲ ਗੱਡੀਆਂ ਦੀ ਮਾਈਲੇਜ ਘੱਟ ਹੋ ਰਹੀ ਹੈ।

ਅਰਵਿੰਦ ਕੇਜਰੀਵਾਲ ਨੇ ਦੱਸਿਆ ਕਿ ਅਸੀਂ ਦਿੱਲੀ ਵਿੱਚ ਵੀ ਇੱਕ ਨੈਸ਼ਨਲ ਟਾਊਨਹਾਲ ਕੀਤਾ ਸੀ, ਜਿਸ ਨੂੰ ਦੇਸ਼ ਭਰ ਵਿੱਚ ਇੱਕ ਨਾਲ 7 ਲੱਖ ਲੋਕਾਂ ਨੇ ਲਾਈਵ ਦੇਖਿਆ ਸੀ। ਦੁਨੀਆ ਵਿੱਚ ਸ਼ਾਇਦ ਅਜਿਹਾ ਪਹਿਲੀ ਵਾਰ ਹੋਇਆ ਕਿ ਇੰਨੀ ਵੱਡੀ ਗਿਣਤੀ ਵਿੱਚ ਲੋਕਾਂ ਨੇ ਇੱਕ ਨਾਲ ਕੋਈ ਵਰਚੁਅਲ ਰੈਲੀ ਲਾਈਵ ਦੇਖੀ ਹੋਵੇ। ਉਸੇ ਦਿਨ ਅਸੀਂ ਤੈਅ ਕੀਤਾ ਸੀ ਕਿ ਅਸੀਂ ਪੂਰੇ ਦੇਸ਼ ਵਿੱਚ ਅਜਿਹੇ ਹੀ ਟਾਊਨਹਾਲ ਕਰਾਂਗੇ। ਹੁਣ ਵੱਖ-ਵੱਖ ਰਾਜਾਂ ਵਿੱਚ ਇਹ ਪ੍ਰੋਗਰਾਮ ਹੋ ਰਹੇ ਹਨ।

ਅਰਵਿੰਦ ਕੇਜਰੀਵਾਲ ਨੇ ਕਿਹਾ ਕਿ ਮੈਂ 29 ਆਟੋ ਮੈਨੂਫੈਕਚਰਿੰਗ ਕੰਪਨੀਆਂ ਨੂੰ ਚਿੱਠੀ ਲਿਖ ਕੇ ਪੁੱਛਿਆ ਸੀ ਕਿ ਕੀ 2023 ਤੋਂ ਪਹਿਲਾਂ ਬਣੀਆਂ ਉਹਨਾਂ ਦੀਆਂ ਕਾਰਾਂ, ਸਕੂਟਰਾਂ ਅਤੇ ਮੋਟਰਸਾਈਕਲਾਂ ਵਿੱਚ ਈ-20 ਦੀ ਸੁਰੱਖਿਅਤ ਵਰਤੋਂ ਕੀਤੀ ਜਾ ਸਕਦੀ ਹੈ? ਕਿਸੇ ਕੰਪਨੀ ਨੇ ਜਵਾਬ ਨਹੀਂ ਦਿੱਤਾ। ਬਾਅਦ ਵਿੱਚ ਫੋਨ ਕਰਨ ਉੱਤੇ ਨੌਂ ਕੰਪਨੀਆਂ ਦੇ ਅਧਿਕਾਰੀਆਂ ਨੇ ਨਾਮ ਨਾ ਦੱਸਣ ਦੀ ਸ਼ਰਤ ਉੱਤੇ ਖੁੱਲ੍ਹ ਕੇ ਗੱਲ ਕੀਤੀ। ਉਹਨਾਂ ਨੇ ਦੱਸਿਆ ਕਿ ਈ-20 ਬਹੁਤ ਖਤਰਨਾਕ ਫਿਊਲ ਹੈ ਅਤੇ 2023 ਤੋਂ ਪਹਿਲਾਂ ਬਣੇ ਪੈਟਰੋਲ ਬੇਸਡ ਵਾਹਨਾਂ ਵਿੱਚ ਇਸ ਦੀ ਵਰਤੋਂ ਬਹੁਤ ਖਤਰਨਾਕ ਹੋਵੇਗੀ। ਕੰਪਨੀਆਂ ਦੇ ਅਧਿਕਾਰੀਆਂ ਨੇ ਕਿਹਾ ਕਿ ਉਹ ਖੁੱਲ੍ਹ ਕੇ ਇਹ ਗੱਲ ਨਹੀਂ ਬੋਲ ਸਕਦੇ ਕਿਉਂਕਿ ਉਹਨਾਂ ਉੱਤੇ ਕੇਂਦਰ ਦੀ ਮੋਦੀ ਸਰਕਾਰ ਦਾ ਭਾਰੀ ਦਬਾਅ ਹੈ। ਜੇਕਰ ਉਹ ਈ-20 ਦੇ ਖਿਲਾਫ ਬੋਲਦੇ ਹਨ, ਤਾਂ ਉਹਨਾਂ ਉੱਤੇ ਈਡੀ, ਸੀਬੀਆਈ ਅਤੇ ਇਨਕਮ ਟੈਕਸ ਦੀ ਰੇਡ ਹੋ ਜਾਵੇਗੀ ਅਤੇ ਉਹਨਾਂ ਦੇ ਪਲਾਂਟ ਬੰਦ ਕਰ ਦਿੱਤੇ ਜਾਣਗੇ।

ਅਰਵਿੰਦ ਕੇਜਰੀਵਾਲ ਨੇ ਕਿਹਾ ਕਿ ਦੇਸ਼ ਦੀਆਂ ਆਟੋਮੋਬਾਈਲ ਮੈਨੂਫੈਕਚਰਿੰਗ ਕੰਪਨੀਆਂ ਦੀ ਸੋਸਾਇਟੀ 'ਸਿਆਮ' (SIAM) ਦੀ ਮੀਟਿੰਗ ਵਿੱਚ ਸਾਰੀਆਂ ਕੰਪਨੀਆਂ ਨੇ ਈ-20 ਨੂੰ ਬੰਦ ਕਰਨ ਦੀ ਮੰਗ ਚੁੱਕੀ ਸੀ। ਸਿਆਮ ਨੇ ਇੱਕ ਰਿਸਰਚ ਬੇਸਡ ਰਿਪੋਰਟ ਤਿਆਰ ਕੀਤੀ, ਜਿਸ ਵਿੱਚ ਈ-20 ਨੂੰ ਬਹੁਤ ਖਤਰਨਾਕ ਦੱਸਿਆ ਗਿਆ ਸੀ। 28 ਜੁਲਾਈ ਨੂੰ ਇਹ ਰਿਪੋਰਟ ਕੇਂਦਰ ਸਰਕਾਰ ਨੂੰ ਸੌਂਪੀ ਗਈ ਅਤੇ ਇਸ ਨੂੰ ਬੰਦ ਕਰਨ ਦੀ ਬੇਨਤੀ ਕੀਤੀ ਗਈ। ਜਦੋਂ ਇਹ ਰਿਪੋਰਟ ਸੋਸ਼ਲ ਮੀਡੀਆ ਉੱਤੇ ਜਨਤਕ ਹੋ ਗਈ, ਤਾਂ ਸਰਕਾਰ ਨੇ ਦਬਾਅ ਪਾ ਕੇ ਇੱਕ ਹਫ਼ਤੇ ਦੇ ਅੰਦਰ ਸਿਆਮ ਤੋਂ ਉਹ ਰਿਪੋਰਟ ਵਾਪਸ ਕਰਵਾ ਲਈ। ਸਿਆਮ ਨੇ ਬਿਆਨ ਦਿੱਤਾ ਕਿ ਸ਼ਾਇਦ ਉਹਨਾਂ ਤੋਂ ਕੋਈ ਗਲਤੀ ਹੋ ਗਈ ਸੀ। ਇੰਨੇ ਵੱਡੇ ਸੰਗਠਨ ਦੀ ਰਿਪੋਰਟ ਵਿੱਚ ਗਲਤੀ ਕਿਵੇਂ ਹੋ ਸਕਦੀ ਹੈ? ਜ਼ਾਹਿਰ ਹੈ ਕਿ ਈਡੀ ਅਤੇ ਸੀਬੀਆਈ ਦੀ ਧਮਕੀ ਦੇ ਕੇ ਅਤੇ ਦਬਾਅ ਪਾ ਕੇ ਵਿਗਿਆਨਕ ਅਤੇ ਥਰਡ ਪਾਰਟੀ ਰਿਪੋਰਟਾਂ ਵਾਪਸ ਕਰਵਾਈਆਂ ਜਾ ਰਹੀਆਂ ਹਨ।

ਅਰਵਿੰਦ ਕੇਜਰੀਵਾਲ ਨੇ ਕਿਹਾ ਕਿ 25 ਲੱਖ ਟਨ ਖੰਡ ਦੇ ਬਰਾਬਰ ਗੰਨੇ ਨੂੰ ਈਥਾਨੌਲ ਬਣਾਉਣ ਲਈ ਡਾਇਵਰਟ ਕਰ ਦਿੱਤਾ ਗਿਆ, ਜਿਸ ਨਾਲ ਦੇਸ਼ ਵਿੱਚ ਖੰਡ ਦੀ ਭਾਰੀ ਘਾਟ ਹੋ ਗਈ। ਪਿਛਲੇ ਇੱਕ ਮਹੀਨੇ ਵਿੱਚ ਖੰਡ ਦੇ ਭਾਅ 30 ਰੁਪਏ ਪ੍ਰਤੀ ਕਿੱਲੋ ਵਧ ਗਏ ਹਨ। 30 ਜੁਲਾਈ ਨੂੰ ਜੋ ਖੰਡ 45 ਰੁਪਏ ਕਿੱਲੋ ਸੀ, ਉਹ ਅੱਜ ਬਾਜ਼ਾਰ ਵਿੱਚ 75 ਰੁਪਏ ਕਿੱਲੋ ਹੈ। ਇੱਕ ਪਾਸੇ ਬੇਵਕੂਫ ਅਤੇ ਅਨਪੜ੍ਹ ਸਰਕਾਰ ਨੇ ਗੰਨੇ ਨੂੰ ਈਥਾਨੌਲ ਲਈ ਡਾਇਵਰਟ ਕਰਕੇ ਪੈਟਰੋਲ ਵਿੱਚ ਮਿਲਾਵਟ ਕੀਤੀ, ਜਿਸ ਨਾਲ ਲੋਕ ਈ-20 ਤੋਂ ਪਰੇਸ਼ਾਨ ਹਨ। ਦੂਜੇ ਪਾਸੇ ਖੰਡ ਵੀ ਮਹਿੰਗੀ ਕਰ ਦਿੱਤੀ, ਜਿਸ ਨਾਲ ਲੋਕ ਹੋਰ ਪਰੇਸ਼ਾਨ ਹਨ। ਸਰਕਾਰ ਦਾ ਦਾਅਵਾ ਸੀ ਕਿ ਪੈਟਰੋਲ ਵਿੱਚ 20 ਫੀਸਦੀ ਈਥਾਨੌਲ ਮਿਲਾਉਣ ਨਾਲ ਕੱਚੇ ਤੇਲ ਦਾ ਆਯਾਤ 20 ਫੀਸਦੀ ਘੱਟ ਹੋਵੇਗਾ ਅਤੇ ਵਿਦੇਸ਼ੀ ਮੁਦਰਾ ਬਚੇਗੀ। ਪਰ ਖੰਡ ਦੀ ਘਾਟ ਦੇ ਕਾਰਨ ਹੁਣ ਦੇਸ਼ ਖੰਡ ਦਾ ਆਯਾਤ ਕਰ ਰਿਹਾ ਹੈ। ਅਜਿਹੇ ਵਿੱਚ ਜੋ ਵਿਦੇਸ਼ੀ ਮੁਦਰਾ ਬਚੀ ਸੀ, ਉਹ ਖੰਡ ਦੇ ਆਯਾਤ ਵਿੱਚ ਖਰਚ ਹੋ ਗਈ।

ਅਰਵਿੰਦ ਕੇਜਰੀਵਾਲ ਨੇ ਕਿਹਾ ਕਿ ਅਜਿਹੀ ਬੇਵਕੂਫ ਸਰਕਾਰ ਮੈਂ ਆਪਣੀ ਜ਼ਿੰਦਗੀ ਵਿੱਚ ਨਹੀਂ ਦੇਖੀ। ਜਦੋਂ ਸਰਕਾਰ ਫੈਸਲੇ ਲੈਂਦੀ ਹੈ, ਤਾਂ ਮਾਹਿਰਾਂ ਨਾਲ ਚਰਚਾ ਕਰਦੀ ਹੈ। ਕੀ ਕਿਸੇ ਮਾਹਿਰ ਨੇ ਇਹ ਨਹੀਂ ਦੱਸਿਆ ਕਿ ਇੰਨਾ ਗੰਨਾ ਡਾਇਵਰਟ ਕਰਨ ਨਾਲ ਖੰਡ ਦੀ ਘਾਟ ਹੋ ਜਾਵੇਗੀ ਜਾਂ ਇਹ ਲੋਕ ਕਿਸੇ ਦੀ ਸੁਣਦੇ ਹੀ ਨਹੀਂ ਹਨ? ਨਿਤਿਨ ਗਡਕਰੀ ਕਹਿੰਦੇ ਸਨ ਕਿ ਈਥਾਨੌਲ ਮਿਕਸ ਕਰਨ ਨਾਲ ਪੈਟਰੋਲ 15 ਰੁਪਏ ਲੀਟਰ ਮਿਲੇਗਾ, ਪਰ ਉਹ ਸਸਤਾ ਨਹੀਂ ਹੋਇਆ। ਸਰਕਾਰ ਦੇ ਸਾਰੇ ਦਾਅਵੇ ਖੋਖਲੇ ਸਾਬਤ ਹੋਏ ਅਤੇ ਦੇਸ਼ ਨੂੰ ਕੋਈ ਫਾਇਦਾ ਨਹੀਂ ਹੋਇਆ। ਕੁਝ ਲੋਕਾਂ ਦਾ ਮੰਨਣਾ ਹੈ ਕਿ ਡੋਨਾਲਡ ਟਰੰਪ, ਮੋਦੀ ਜੀ ਉੱਤੇ ਦਬਾਅ ਪਾ ਰਹੇ ਹਨ। ਅਮਰੀਕਾ ਕੋਲ ਈਥਾਨੌਲ ਸਰਪਲਸ ਹੈ ਅਤੇ ਸਰਕਾਰ ਦੁਆਰਾ ਪੈਦਾ ਕੀਤੀ ਗਈ ਇਸ ਬਣਾਉਟੀ ਘਾਟ ਤੋਂ ਬਾਅਦ ਹੁਣ ਅਮਰੀਕਾ ਤੋਂ ਈਥਾਨੌਲ ਆਯਾਤ ਕੀਤਾ ਜਾਵੇਗਾ, ਤਾਂ ਜੋ ਈ-20 ਨੂੰ ਵਧਾ ਕੇ ਈ-30 ਅਤੇ ਈ-40 ਕੀਤਾ ਜਾ ਸਕੇ।

ਅਰਵਿੰਦ ਕੇਜਰੀਵਾਲ ਨੇ ਕਿਹਾ ਕਿ ਦੇਸ਼ ਵਿੱਚ 80 ਫੀਸਦੀ ਵਾਹਨ ਈ-20 ਦੇ ਲਾਇਕ ਨਹੀਂ ਹਨ, ਫਿਰ ਵੀ ਇਸ ਨੂੰ ਧੱਕੇ ਨਾਲ ਠੋਸਿਆ ਜਾ ਰਿਹਾ ਹੈ। ਸਰਕਾਰ ਕਹਿ ਰਹੀ ਹੈ ਕਿ ਉਹ ਈ-30 ਦਾ ਟ੍ਰਾਇਲ ਅਤੇ ਰਿਸਰਚ ਕਰ ਰਹੀ ਹੈ, ਪਰ ਭਾਜਪਾ ਵਾਲੇ ਕੋਈ ਸਟੱਡੀ ਨਹੀਂ ਕਰਦੇ। ਇਹ ਅਨਪੜ੍ਹ ਲੋਕ ਹਨ, ਇਹਨਾਂ ਨੂੰ ਸਟੱਡੀ ਕਰਨੀ ਹੀ ਨਹੀਂ ਆਉਂਦੀ। ਇਹ ਲੋਕ ਬੱਸ ਮਾਹੌਲ ਦੇਖ ਰਹੇ ਹਨ। ਜਿਵੇਂ ਹੀ ਈ-20 ਦਾ ਮਾਮਲਾ ਸ਼ਾਂਤ ਹੋਵੇਗਾ, ਉਹ ਈ-30, ਈ-40 ਅਤੇ ਈ-85 ਤੱਕ ਲੈ ਆਉਣਗੇ। ਇਸ ਲਈ ਲੋਕ ਅਜੇ ਬਾਜ਼ਾਰ ਤੋਂ ਨਵੀਂ ਗੱਡੀ ਨਾ ਖਰੀਦਣ, ਕਿਉਂਕਿ ਸਰਕਾਰ ਸਾਲ ਭਰ ਵਿੱਚ ਈ-20 ਗੱਡੀਆਂ ਵਿੱਚ ਈ-30 ਅਤੇ ਈ-40 ਪੈਟਰੋਲ ਠੋਸ ਦੇਵੇਗੀ, ਜਿਸ ਨਾਲ ਗੱਡੀਆਂ ਖਰਾਬ ਹੋ ਜਾਣਗੀਆਂ। ਸਰਕਾਰ ਨੇ ਡੀਜ਼ਲ ਅਤੇ ਸੀਐਨਜੀ ਵਿੱਚ ਵੀ ਮਿਲਾਵਟ ਕਰਨ ਦਾ ਐਲਾਨ ਕਰ ਦਿੱਤਾ ਹੈ।

ਅਰਵਿੰਦ ਕੇਜਰੀਵਾਲ ਨੇ ਹੋਰਾਂ ਦੇਸ਼ਾਂ ਦੀਆਂ ਉਦਾਹਰਨਾਂ ਦਿੰਦੇ ਹੋਏ ਦੱਸਿਆ ਕਿ ਜਿਹਨਾਂ ਦੇਸ਼ਾਂ ਨੇ ਈਥਾਨੌਲ ਲਾਗੂ ਕੀਤਾ, ਉਹਨਾਂ ਨੇ ਲੰਬਾ ਸਮਾਂ ਲਿਆ। ਜਾਪਾਨ ਵਿੱਚ ਅਜੇ ਈ-3 ਲਾਗੂ ਹੈ ਅਤੇ ਉਹ ਈ-20 ਤੱਕ 2040 ਵਿੱਚ ਪਹੁੰਚੇਗਾ। ਅਮਰੀਕਾ ਦੁਨੀਆ ਵਿੱਚ ਸਭ ਤੋਂ ਜ਼ਿਆਦਾ ਈਥਾਨੌਲ ਬਣਾਉਂਦਾ ਹੈ, ਫਿਰ ਵੀ ਉੱਥੇ ਈ-10 ਲਾਗੂ ਹੈ। ਬ੍ਰਾਜ਼ੀਲ ਵਿੱਚ 1931 ਵਿੱਚ ਈ-5 ਆਇਆ ਸੀ ਅਤੇ 55 ਸਾਲ ਬਾਅਦ 1985 ਵਿੱਚ ਈ-20 ਆਇਆ। ਈਥਾਨੌਲ ਬੇਸਡ ਫਿਊਲ ਲਾਗੂ ਕਰਨ ਤੋਂ ਪਹਿਲਾਂ ਭਾਰੀ ਤਿਆਰੀ ਦੀ ਲੋੜ ਹੁੰਦੀ ਹੈ। ਆਇਲ ਟੈਂਕਰ, ਪੈਟਰੋਲ ਪੰਪ ਦੇ ਸਟੋਰੇਜ ਟੈਂਕ ਅਤੇ ਗੱਡੀਆਂ ਦੇ ਇੰਜਣ ਬਦਲਣੇ ਪੈਂਦੇ ਹਨ। ਨਵੀਆਂ ਗੱਡੀਆਂ ਨੂੰ ਈ-20 ਦੇ ਅਨੁਕੂਲ ਬਣਾਉਣਾ ਪੈਂਦਾ ਹੈ, ਜਿਸ ਵਿੱਚ 15-20 ਸਾਲ ਦਾ ਸਮਾਂ ਲੱਗਦਾ ਹੈ, ਪਰ ਮੋਦੀ ਜੀ ਨੇ ਇਹ ਸਭ 3 ਸਾਲ ਵਿੱਚ ਕਰ ਦਿੱਤਾ।

ਅਰਵਿੰਦ ਕੇਜਰੀਵਾਲ ਨੇ ਕਿਹਾ ਕਿ ਜੋ ਕੋਈ ਵੀ ਈ-20 ਦੇ ਖਿਲਾਫ ਆਵਾਜ਼ ਉਠਾਉਂਦਾ ਹੈ, ਇਹ ਲੋਕ ਉਸ ਨੂੰ ਐਂਟੀ-ਨੈਸ਼ਨਲ ਬੋਲ ਦਿੰਦੇ ਹਨ। ਇੱਕ ਆਮ ਆਦਮੀ ਆਪਣੀ ਹੈਸੀਅਤ ਤੋਂ ਵੱਧ ਕੇ ਲੋਨ ਲੈ ਕੇ ਜਾਂ ਆਪਣੀ ਬੱਚਤ ਲਗਾ ਕੇ ਗੱਡੀ ਖਰੀਦਦਾ ਹੈ। 10,000 ਕਿਲੋਮੀਟਰ ਦੀ ਗਾਰੰਟੀ ਦੇ ਅੰਦਰ ਹੀ ਨਵੀਆਂ ਗੱਡੀਆਂ ਖਰਾਬ ਹੋ ਰਹੀਆਂ ਹਨ। ਜਦੋਂ ਕਿਸੇ ਦੀ ਗੱਡੀ ਖਰਾਬ ਹੁੰਦੀ ਹੈ, ਤਾਂ ਉਸ ਨੂੰ ਭਾਰੀ ਆਰਥਿਕ ਅਤੇ ਮਾਨਸਿਕ ਪਰੇਸ਼ਾਨੀ ਉਠਾਉਣੀ ਪੈਂਦੀ ਹੈ।

ਅਰਵਿੰਦ ਕੇਜਰੀਵਾਲ ਨੇ ਕਿਹਾ ਕਿ ਭਾਜਪਾ ਵਾਲਿਆਂ ਨੂੰ ਹੰਕਾਰ ਹੈ ਕਿ ਉਹ ਜੋ ਮਰਜ਼ੀ ਕਰ ਲੈਣ, ਜਿੱਤਣਾ ਤਾਂ ਉਹਨਾਂ ਨੇ ਹੀ ਹੈ। ਜਨਤਾ ਤਾਂ ਉਹਨਾਂ ਨੂੰ ਹੀ ਵੋਟ ਦੇਵੇਗੀ। ਇਹਨਾਂ ਨੂੰ ਇਹ ਹੰਕਾਰ ਹੈ ਕਿ ਜਨਤਾ ਤਾਂ ਇਹਨਾਂ ਦੇ ਕੋਲ ਹੀ ਆਵੇਗੀ। ਪਰ ਜੇਕਰ ਇਸ ਵਾਰ ਵਿਧਾਨ ਸਭਾ ਚੋਣਾਂ ਵਿੱਚ ਗੋਆ ਅਤੇ ਉੱਤਰ ਪ੍ਰਦੇਸ਼ ਵਿੱਚ ਭਾਜਪਾ ਹਾਰ ਜਾਵੇ, ਤਾਂ 10 ਮਾਰਚ ਨੂੰ ਨਤੀਜੇ ਆਉਣ ਤੋਂ ਬਾਅਦ 15 ਮਾਰਚ ਤੱਕ ਈ-20 ਵਾਪਸ ਹੋ ਜਾਵੇਗਾ। ਗੋਆ ਵਿੱਚ 87 ਫੀਸਦੀ ਲੋਕਾਂ ਕੋਲ ਦੋ-ਪਹੀਆ ਅਤੇ 47 ਫੀਸਦੀ ਲੋਕਾਂ ਕੋਲ ਚਾਰ-ਪਹੀਆ ਵਾਹਨ ਹਨ, ਜੋ ਈ-20 ਤੋਂ ਪਰੇਸ਼ਾਨ ਹਨ। ਜੇਕਰ ਸਾਰੇ ਮਿਲ ਕੇ ਇੱਕ ਵਾਰ ਠਾਣ ਲੈਣ ਕਿ ਇਸ ਵਾਰ ਭਾਜਪਾ ਨੂੰ ਵੋਟ ਨਹੀਂ ਦੇਣਾ ਹੈ, ਤਾਂ ਮੈਨੂੰ ਲਗਦਾ ਹੈ 5 ਦਿਨਾਂ ਦੇ ਅੰਦਰ ਜੇਕਰ ਈ-20 ਵਾਪਸ ਨਹੀਂ ਹੋਇਆ, ਤਾਂ ਮੈਂ ਆਪਣੀ ਰਾਜਨੀਤੀ ਛੱਡ ਦਿਆਂਗਾ। ਇਸ ਵਾਰ ਗੋਆ ਦੇ ਅੰਦਰ ਸਾਰੇ ਲੋਕ ਭਾਜਪਾ ਨੂੰ ਹਰਾ ਕੇ ਦਿਖਾ ਦੇਣ। ਦੇਖਿਓ, 5 ਦਿਨਾਂ ਦੇ ਅੰਦਰ ਈ-20 ਵਾਪਸ ਹੋ ਜਾਵੇਗਾ।

-arvindkejriwal-e20-punjabpolitics-bjp-modigovernment-aap-jagratilahar