ਪੰਜਾਬ ਅਤੇ ਯੂਕੇ ਵਿਚਕਾਰ ਖੇਤੀਬਾੜੀ ਤੇ ਫੂਡ ਪ੍ਰੋਸੈਸਿੰਗ ਖੇਤਰ ਵਿੱਚ ਸਹਿਯੋਗ ਵਧਾਉਣ ਲਈ ਅਹਿਮ ਵਿਚਾਰ-ਵਟਾਂਦਰਾ

 ਦੁਵੱਲੇ ਨਿਵੇਸ਼, ਵਪਾਰ ਅਤੇ ਤਕਨੀਕੀ ਸਾਂਝੇਦਾਰੀ ਦੇ ਮੌਕਿਆਂ ’ਤੇ ਚਰਚਾ

ਲੁਧਿਆਣਾ, 31 ਅਕਤੂਬਰ:

ਪੰਜਾਬ ਅਤੇ ਯੂਨਾਈਟਿਡ ਕਿੰਗਡਮ (ਯੂਕੇ) ਵਿਚਕਾਰ ਖੇਤੀਬਾੜੀ ਅਤੇ ਫੂਡ ਪ੍ਰੋਸੈਸਿੰਗ ਖੇਤਰ ਵਿੱਚ ਦੁਵੱਲੇ ਨਿਵੇਸ਼, ਵਪਾਰ ਅਤੇ ਤਕਨੀਕੀ ਸਹਿਯੋਗ ਨੂੰ ਹੁਲਾਰਾ ਦੇਣ ਦੇ ਉਦੇਸ਼ ਨਾਲ 30 ਅਕਤੂਬਰ ਨੂੰ ਮੈਗਾ ਫੂਡ ਪਾਰਕ, ਲਾਡੋਵਾਲ, ਲੁਧਿਆਣਾ ਵਿਖੇ ਯੂਕੇ-ਪੰਜਾਬ ਐਗਰੀ-ਟੈਕ ਗੋਲਮੇਜ਼ ਕਾਨਫਰੰਸ ਕਰਵਾਈ ਗਈ। ਇਸ ਵਿੱਚ ਯੂਕੇ ਦੇ ਵਫ਼ਦ ਅਤੇ ਪੰਜਾਬ ਦੇ ਪ੍ਰਮੁੱਖ ਫੂਡ ਪ੍ਰੋਸੈਸਿੰਗ ਉਦਯੋਗਾਂ ਦੇ ਨੁਮਾਇੰਦਿਆਂ ਨੇ ਸ਼ਮੂਲੀਅਤ ਕੀਤੀ।

ਕਾਨਫਰੰਸ ਦੌਰਾਨ ਬ੍ਰਿਟਿਸ਼ ਡਿਪਟੀ ਹਾਈ ਕਮਿਸ਼ਨਰ ਸ਼੍ਰੀਮਤੀ ਐਲਬਾ ਸਮੈਰੀਗਲੀਓ ਦੀ ਅਗਵਾਈ ਹੇਠ ਯੂਕੇ ਸਰਕਾਰ ਦੇ ਵਪਾਰ, ਨਵੀਨਤਾ, ਵਿਗਿਆਨ ਅਤੇ ਵਪਾਰ ਵਿਭਾਗ ਦੇ ਮਾਹਿਰਾਂ ਨੇ ਉਦਯੋਗਿਕ ਨੁਮਾਇੰਦਿਆਂ ਨਾਲ ਵਿਸਥਾਰਪੂਰਵਕ ਵਿਚਾਰ-ਵਟਾਂਦਰਾ ਕੀਤਾ। ਇਹ ਸਮਾਗਮ ਪੰਜਾਬ ਐਗਰੋ ਇੰਡਸਟਰੀਜ਼ ਕਾਰਪੋਰੇਸ਼ਨ (ਪੀ.ਏ.ਆਈ.ਸੀ.), ਕਨਫੈਡਰੇਸ਼ਨ ਆਫ ਇੰਡੀਅਨ ਇੰਡਸਟਰੀ (ਸੀ.ਆਈ.ਆਈ.) ਅਤੇ ਇਨਵੈਸਟ ਪੰਜਾਬ ਵੱਲੋਂ ਸਾਂਝੇ ਤੌਰ ’ਤੇ ਕਰਵਾਇਆ ਗਿਆ।

ਇਸ ਮੌਕੇ ਪੀ.ਏ.ਆਈ.ਸੀ. ਦੇ ਵਧੀਕ ਮੈਨੇਜਿੰਗ ਡਾਇਰੈਕਟਰ ਸ਼੍ਰੀ ਰਿਸ਼ਭ ਬਾਂਸਲ, ਸੀ.ਆਈ.ਆਈ. ਲੁਧਿਆਣਾ ਜ਼ੋਨ ਦੇ ਸਾਬਕਾ ਚੇਅਰਮੈਨ ਸ਼੍ਰੀ ਅਸ਼ਪ੍ਰੀਤ ਸਾਹਨੀ, ਬ੍ਰਿਟਿਸ਼ ਮਿਸ਼ਨ ਦੇ ਡਿਪਟੀ ਹੈੱਡ ਸ਼੍ਰੀ ਅਮਨਦੀਪ ਗਰੇਵਾਲ, ਸੀਨੀਅਰ ਵਪਾਰ ਸਲਾਹਕਾਰ ਸ਼੍ਰੀ ਅਨੂਪ ਨਾਰਾਇਣਨ ਅਤੇ ਪੀ.ਏ.ਆਈ.ਸੀ. ਦੇ ਜਨਰਲ ਮੈਨੇਜਰ ਸ਼੍ਰੀ ਜਪਿੰਦਰ ਸਿੰਘ ਬਾਜਵਾ ਸਮੇਤ ਕਈ ਸੀਨੀਅਰ ਅਧਿਕਾਰੀ ਮੌਜੂਦ ਸਨ। ਗੋਦਰੇਜ ਫੂਡਜ਼, ਬੋਨ ਬ੍ਰੈੱਡ, ਕ੍ਰੀਮਿਕਾ ਫੂਡਜ਼, ਡੇਲਮੋਂਟੇ, ਬਸੰਤ ਫੂਡਜ਼, ਸਟਾਰ ਫੂਡਜ਼, ਆਨੰਦ ਕਰਤਾਰ ਬੇਕਰੀ, ਜੀ.ਈ.ਪੀ. ਗਰੁੱਪ, ਮਾਮਾ ਗ੍ਰੇਨ, ਚਾਣਕਿਆ ਡੇਅਰੀ, ਬੀਹੀਵ ਫਾਰਮਜ਼, ਬੀ.ਡੀ. ਐਗਰੋ, ਅਮਰ ਐਗਰੀਕਲਚਰ, ਬੀ.ਐਫ. ਬਾਇਓਟੈਕ, ਮਿਲਕਫੈੱਡ ਅਤੇ ਮਾਰਕਫੈੱਡ ਦੇ ਨੁਮਾਇੰਦਿਆਂ ਨੇ ਵੀ ਹਿੱਸਾ ਲਿਆ।

ਵਿਚਾਰ-ਵਟਾਂਦਰੇ ਦੌਰਾਨ ਭਾਰਤ-ਯੂਕੇ ਮੁਕਤ ਵਪਾਰ ਸਮਝੌਤੇ (ਐੱਫ.ਟੀ.ਏ.) ਤਹਿਤ ਉਪਲਬਧ ਹੋਣ ਵਾਲੇ ਮੌਕਿਆਂ ’ਤੇ ਵਿਸ਼ੇਸ਼ ਧਿਆਨ ਦਿੱਤਾ ਗਿਆ। ਟੈਰਿਫਾਂ ਵਿੱਚ ਕਟੌਤੀ ਨਾਲ ਦੁਵੱਲੇ ਵਪਾਰ ਅਤੇ ਨਿਵੇਸ਼ ਨੂੰ ਹੁਲਾਰਾ ਮਿਲਣ, ਖੇਤੀਬਾੜੀ ਅਤੇ ਫੂਡ ਪ੍ਰੋਸੈਸਿੰਗ ਮਸ਼ੀਨਰੀ ਦੀ ਦਰਾਮਦ-ਬਰਾਮਦ ਆਸਾਨ ਹੋਣ ਅਤੇ ਕਸਟਮ ਪ੍ਰਕਿਰਿਆਵਾਂ ਸਰਲ ਬਣਨ ਦੀਆਂ ਸੰਭਾਵਨਾਵਾਂ ਬਾਰੇ ਚਰਚਾ ਕੀਤੀ ਗਈ। ਰੋਬੋਟਿਕ ਪੈਕੇਜਿੰਗ ਉਪਕਰਣਾਂ ਦੀ ਉਦਾਹਰਣ ਦਿੰਦਿਆਂ ਦੱਸਿਆ ਗਿਆ ਕਿ ਐੱਫ.ਟੀ.ਏ. ਤਹਿਤ ਇਨ੍ਹਾਂ ਉੱਤੇ ਟੈਰਿਫ ਲਗਭਗ 8 ਫ਼ੀਸਦੀ ਤੋਂ ਘਟ ਕੇ ਜ਼ੀਰੋ ਦੇ ਨੇੜੇ ਆ ਗਿਆ ਹੈ।

ਇਸ ਤੋਂ ਇਲਾਵਾ ਪ੍ਰਜਨਨ ਤਕਨੀਕਾਂ, ਜੈਨੇਟਿਕਸ, ਕਾਰਬਨ ਪ੍ਰੋਜੈਕਟਾਂ, ਪਸ਼ੂ ਪਾਲਣ, ਬਾਗਬਾਨੀ ਅਤੇ ਪੰਜਾਬ ਦੇ ਖੇਤੀਬਾੜੀ ਖੇਤਰ ਦੇ ਆਧੁਨਿਕੀਕਰਨ ਵਰਗੇ ਖੇਤਰਾਂ ਵਿੱਚ ਸਹਿਯੋਗ ਦੀਆਂ ਸੰਭਾਵਨਾਵਾਂ ਤਲਾਸ਼ੀਆਂ ਗਈਆਂ। ਯੂਕੇ ਦੇ ਵਫ਼ਦ ਨੇ ਵਪਾਰਕ ਨਵੀਨਤਾ, ਵਿਗਿਆਨ, ਟਰੇਸੇਬਿਲਟੀ ਅਤੇ ਗੁਣਵੱਤਾ ਜਾਂਚ ਨੂੰ ਆਪਣੇ ਮੁੱਖ ਤਰਜੀਹੀ ਖੇਤਰ ਦੱਸਦਿਆਂ ਸਾਂਝੇ ਉੱਦਮਾਂ ਅਤੇ ਨਿਵੇਸ਼ ਨੂੰ ਉਤਸ਼ਾਹਿਤ ਕਰਨ ’ਤੇ ਜ਼ੋਰ ਦਿੱਤਾ।

ਪੰਜਾਬ ਦੇ ਉਦਯੋਗਿਕ ਨੁਮਾਇੰਦਿਆਂ ਨੇ ਖੇਤੀਬਾੜੀ ਉਤਪਾਦਕਤਾ ਵਧਾਉਣ ਲਈ ਬਿਹਤਰ ਬੀਜ ਆਲੂ ਦੀਆਂ ਕਿਸਮਾਂ ਅਤੇ ਆਧੁਨਿਕ ਤਕਨੀਕਾਂ ਤੱਕ ਪਹੁੰਚ ਸੁਖਾਲੀ ਬਣਾਉਣ ਦੀ ਮੰਗ ਰੱਖੀ। ਇਸ ਦੇ ਨਾਲ ਹੀ ਪੰਜਾਬ ਤੋਂ ਕੱਚੇ ਚਿਕਨ ਦੀ ਯੂਕੇ ਨੂੰ ਬਰਾਮਦ ਕਰਨ ਦੀ ਸੰਭਾਵਨਾ ਅਤੇ ਮਿਲਕਫੈੱਡ ਦੀ ਯੂਕੇ ਦੇ ਬਾਜ਼ਾਰ ਵਿੱਚ ਪਹੁੰਚ ਵਧਾਉਣ ਲਈ ਸਾਂਝੇਦਾਰੀ ਸਥਾਪਤ ਕਰਨ ਬਾਰੇ ਵੀ ਦਿਲਚਸਪੀ ਪ੍ਰਗਟਾਈ ਗਈ।

ਪੰਜਾਬ ਐਗਰੋ ਵੱਲੋਂ ਮੈਗਾ ਫੂਡ ਪਾਰਕ, ਲੁਧਿਆਣਾ ਵਿਖੇ ਬ੍ਰਿਟਿਸ਼ ਫੂਡ ਪ੍ਰੋਸੈਸਿੰਗ ਕੰਪਨੀਆਂ ਲਈ ਉਪਲਬਧ ਨਿਵੇਸ਼ ਮੌਕਿਆਂ ਬਾਰੇ ਜਾਣਕਾਰੀ ਦਿੱਤੀ ਗਈ। ਨਾਲ ਹੀ ਪੀ.ਏ.ਆਈ.ਸੀ. ਨੇ ਭਰੋਸਾ ਦਿੱਤਾ ਕਿ ਉਹ ਮੈਗਾ ਫੂਡ ਪਾਰਕ ਵਿੱਚ ਕੰਮ ਕਰ ਰਹੇ ਉਦਯੋਗਾਂ ਅਤੇ ਯੂਕੇ ਦੀਆਂ ਸਬੰਧਤ ਕੰਪਨੀਆਂ ਵਿਚਕਾਰ ਤਾਲਮੇਲ ਸਥਾਪਤ ਕਰਨ ਲਈ ਸਹੂਲਤਕਾਰ ਵਜੋਂ ਕੰਮ ਕਰੇਗੀ, ਤਾਂ ਜੋ ਵਪਾਰਕ ਸਬੰਧਾਂ, ਸਾਂਝੇ ਉੱਦਮਾਂ ਅਤੇ ਆਪਸੀ ਲਾਭਦਾਇਕ ਭਾਈਵਾਲੀਆਂ ਨੂੰ ਉਤਸ਼ਾਹਿਤ ਕੀਤਾ ਜਾ ਸਕੇ।

ਇਹ ਗੋਲਮੇਜ਼ ਕਾਨਫਰੰਸ ਪੰਜਾਬ ਅਤੇ ਯੂਕੇ ਦੇ ਉਦਯੋਗਿਕ ਹਿੱਸੇਦਾਰਾਂ ਨੂੰ ਇੱਕ ਸਾਂਝਾ ਮੰਚ ਪ੍ਰਦਾਨ ਕਰਨ ਵਿੱਚ ਸਫ਼ਲ ਰਹੀ, ਜਿਸ ਨਾਲ ਖੇਤੀਬਾੜੀ ਅਤੇ ਫੂਡ ਪ੍ਰੋਸੈਸਿੰਗ ਖੇਤਰ ਵਿੱਚ ਨਿਵੇਸ਼, ਤਕਨਾਲੋਜੀ ਦੇ ਤਬਾਦਲੇ ਅਤੇ ਦੁਵੱਲੇ ਸਹਿਯੋਗ ਦੇ ਨਵੇਂ ਰਾਹ ਖੁੱਲ੍ਹਣ ਦੀ ਉਮੀਦ ਹੈ।