19 ਜੁਲਾਈ ਤੋਂ 15 ਸਤੰਬਰ ਤੱਕ ‘‘ਆਪ’’ ਹੈੱਡਕੁਆਰਟਰ ਦੇ ਪਤੇ ’ਤੇ ਕੇਂਦਰ ਸਰਕਾਰ ਦੇ ਵਿਭਾਗ ਦੀ ਛੱਤਰ-ਛਾਇਆ ਹੇਠ 58 ਫਰਜ਼ੀ ਕੰਪਨੀਆਂ/ਬਿਜ਼ਨਸ ਰਜਿਸਟਰਡ ਹੋਏ- ਸੌਰਭ ਭਾਰਦਵਾਜ
ਪੰਜਾਬ ਚੋਣਾਂ ਤੋਂ ਪਹਿਲਾਂ ਭਾਜਪਾ ਸਰਕਾਰ ਦੀ ‘‘ਆਪ’’ ’ਤੇ ਸੈਂਕੜੇ ਸ਼ੈੱਲ ਕੰਪਨੀਆਂ ਚਲਾਉਣ ਦੇ ਝੂਠੇ ਦੋਸ਼ ਲਗਾ ਕੇ ਬਦਨਾਮ ਕਰਨ ਦੀ ਯੋਜਨਾ ਸੀ- ਸੌਰਭ ਭਾਰਦਵਾਜ
ਕੇਂਦਰ ਸਰਕਾਰ ਦੱਸੇ, ਸਰਕਾਰੀ ਰਿਹਾਇਸ਼ ਦੇ ਪਤੇ ’ਤੇ ਵੱਖ-ਵੱਖ ਨਾਵਾਂ ਨਾਲ 58 ਜੀਐੱਸਟੀ ਰਜਿਸਟ੍ਰੇਸ਼ਨਾਂ ਕਿਵੇਂ ਹੋ ਗਈਆਂ?- ਸੌਰਭ ਭਾਰਦਵਾਜ
2022 ਦੀਆਂ ਪੰਜਾਬ ਚੋਣਾਂ ਤੋਂ ਪਹਿਲਾਂ ਵੀ ‘‘ਆਪ’’ ਨੂੰ ਹਰਾਉਣ ਲਈ ਖਾਲਿਸਤਾਨੀਆਂ ਤੋਂ ਫੰਡ ਲੈਣ ਦੇ ਝੂਠੇ ਦੋਸ਼ ਲਗਾਏ ਗਏ ਸਨ- ਸੌਰਭ ਭਾਰਦਵਾਜ
ਦਿੱਲੀ ਚੋਣਾਂ ਵਿੱਚ ਵੀ ਭਾਜਪਾ ਸਰਕਾਰ ਨੇ ਸ਼ਰਾਬ ਘੁਟਾਲੇ ਦਾ ਝੂਠਾ ਦੋਸ਼ ਲਗਾ ਕੇ ‘‘ਆਪ’’ ਨੂੰ ਬਦਨਾਮ ਕੀਤਾ ਅਤੇ ਬਾਅਦ ਵਿੱਚ ਕੁਝ ਨਹੀਂ ਨਿਕਲਿਆ - ਸੌਰਭ ਭਾਰਦਵਾਜ
ਦਿੱਲੀ ਵਾਂਗ ਪੰਜਾਬ ਵਿੱਚ ਵੀ ਆਮ ਆਦਮੀ ਪਾਰਟੀ ਨੂੰ ਝੂਠੇ ਮਾਮਲੇ ਵਿੱਚ ਬਦਨਾਮ ਕਰਕੇ ਚੋਣਾਂ ਹਰਾਉਣ ਦੀ ਭਾਜਪਾ ਦੀ ਕੇਂਦਰ ਸਰਕਾਰ ਸਾਜ਼ਿਸ਼ ਰਚ ਰਹੀ ਸੀ। ਇਹ ਵੱਡਾ ਖੁਲਾਸਾ ਕਰਦਿਆਂ ਪਾਰਟੀ ਦੇ ਦਿੱਲੀ ਪ੍ਰਦੇਸ਼ ਪ੍ਰਧਾਨ ਸੌਰਭ ਭਾਰਦਵਾਜ ਨੇ ਦੱਸਿਆ ਕਿ ਪਿਛਲੇ ਦੋ ਮਹੀਨਿਆਂ ਤੋਂ ਭਾਜਪਾ ਸਰਕਾਰ ਇਹ ਸਾਜ਼ਿਸ਼ ਰਚ ਰਹੀ ਸੀ। ਭਾਜਪਾ ਸਰਕਾਰ ਦੀ ਯੋਜਨਾ ਸੀ ਕਿ ਚੋਣਾਂ ਤੋਂ ਠੀਕ ਪਹਿਲਾਂ ਨਸ਼ਾ ਤਸਕਰਾਂ ਤੋਂ ਕਰੋੜਾਂ ਰੁਪਏ ਲੈਣ ਦਾ ਝੂਠਾ ਦੋਸ਼ ਲਗਾ ਕੇ ‘‘ਆਪ’’ ਨੂੰ ਬਦਨਾਮ ਕੀਤਾ ਜਾਵੇਗਾ। ਇਸ ਲਈ ਕੇਂਦਰ ਸਰਕਾਰ ਦੇ ਵਿਭਾਗ ਦੀ ਸ਼ਹਿ ’ਤੇ 19 ਜੁਲਾਈ ਤੋਂ 15 ਸਤੰਬਰ ਤੱਕ ‘‘ਆਪ’’ ਹੈੱਡਕੁਆਰਟਰ ਦੇ ਪਤੇ ’ਤੇ 58 ਫਰਜ਼ੀ ਕੰਪਨੀਆਂ ਰਜਿਸਟਰਡ ਕੀਤੀਆਂ ਗਈਆਂ, ਤਾਂ ਜੋ ਭਾਜਪਾ ਸਰਕਾਰ ਇਹ ਪ੍ਰਚਾਰ ਕਰ ਸਕੇ ਕਿ ‘‘ਆਪ’’ ਸੈਂਕੜੇ ਸ਼ੈੱਲ ਕੰਪਨੀਆਂ ਚਲਾ ਰਹੀ ਸੀ। ਪਰ ਇਸ ਤੋਂ ਪਹਿਲਾਂ ਹੀ ਸਾਜ਼ਿਸ਼ ਫੜੀ ਗਈ। ਹੁਣ ਕੇਂਦਰ ਸਰਕਾਰ ਤਫ਼ਤੀਸ਼ ਕਰਕੇ ਦੱਸੇ ਕਿ ਸਰਕਾਰੀ ਰਿਹਾਇਸ਼ ਦੇ ਪਤੇ ’ਤੇ ਵੱਖ-ਵੱਖ ਨਾਵਾਂ ਨਾਲ 58 ਜੀਐੱਸਟੀ ਰਜਿਸਟ੍ਰੇਸ਼ਨਾਂ ਕਿਵੇਂ ਹੋ ਗਈਆਂ?
ਮੰਗਲਵਾਰ ਨੂੰ “ਆਪ” ਹੈੱਡਕੁਆਰਟਰ ਵਿਖੇ ਪ੍ਰੈੱਸ ਕਾਨਫਰੰਸ ਕਰਦਿਆਂ ਸੌਰਭ ਭਾਰਦਵਾਜ ਨੇ ਕਿਹਾ ਕਿ ਜਿਵੇਂ ਦਿੱਲੀ ਚੋਣਾਂ ਤੋਂ ਪਹਿਲਾਂ ਆਮ ਆਦਮੀ ਪਾਰਟੀ ’ਤੇ ਰੋਜ਼ ਨਵੇਂ ਝੂਠੇ ਦੋਸ਼ ਲਗਾਏ ਗਏ ਅਤੇ ਸ਼ਰਾਬ ਵਿੱਚ ਕਰੋੜਾਂ ਰੁਪਏ ਦੇ ਘੁਟਾਲੇ ਦੀ ਗੱਲ ਕਹੀ ਗਈ, ਪਰ ਦਿੱਲੀ ਚੋਣਾਂ ਵਿੱਚ ਧੋਖੇ ਨਾਲ ਆਮ ਆਦਮੀ ਪਾਰਟੀ ਨੂੰ ਹਰਾਉਣ ਤੋਂ ਬਾਅਦ ਚਾਰਜਸ਼ੀਟ ਤੱਕ ਨਹੀਂ ਹੋ ਸਕੀ। ਉਸ ਮਾਮਲੇ ਵਿੱਚ ਅਦਾਲਤ ਨੇ ਚਾਰਜਸ਼ੀਟ ਦੇ ਪੜਾਅ ’ਤੇ ਹੀ ਡਿਸਚਾਰਜ ਕਰ ਦਿੱਤਾ ਕਿ ਕੇਸ ਬਣਦਾ ਹੀ ਨਹੀਂ। ਠੀਕ ਉਸੇ ਤਰ੍ਹਾਂ 2022 ਦੀਆਂ ਪੰਜਾਬ ਚੋਣਾਂ ਤੋਂ ਪਹਿਲਾਂ ਕਿਹਾ ਗਿਆ ਸੀ ਕਿ ਖਾਲਿਸਤਾਨੀਆਂ ਨੇ ਆਮ ਆਦਮੀ ਪਾਰਟੀ ਦੀ ਫੰਡਿੰਗ ਕੀਤੀ ਹੈ। ਉਦੋਂ ਕਿਹਾ ਗਿਆ ਸੀ ਕਿ ਸਬੂਤ ਆ ਗਏ ਹਨ, ਕਰੋੜਾਂ ਰੁਪਏ ਆਏ ਹਨ ਅਤੇ ਕੇਸ ਦਰਜ ਹੋਣ ਵਾਲਾ ਹੈ, ਪਰ ਬਾਅਦ ਵਿੱਚ ਸਰਕਾਰ ਨੇ ਹੀ ਅਦਾਲਤ ਵਿੱਚ ਕਹਿ ਦਿੱਤਾ ਕਿ ਅਜਿਹਾ ਕੋਈ ਮਾਮਲਾ ਨਹੀਂ ਬਣਦਾ।
ਸੌਰਭ ਭਾਰਦਵਾਜ ਨੇ ਖੁਲਾਸਾ ਕੀਤਾ ਕਿ 2027 ਦੀਆਂ ਪੰਜਾਬ ਚੋਣਾਂ ਤੋਂ ਪਹਿਲਾਂ ਵੀ ਆਮ ਆਦਮੀ ਪਾਰਟੀ ਖਿਲਾਫ ਇੱਕ ਵੱਡੀ ਸਾਜ਼ਿਸ਼ ਰਚੀ ਜਾ ਰਹੀ ਸੀ। ਫਰਵਰੀ 2027 ਦੀਆਂ ਚੋਣਾਂ ਤੋਂ ਪਹਿਲਾਂ ਦਸੰਬਰ ਜਾਂ ਜਨਵਰੀ ਵਿੱਚ ਭਾਜਪਾ ਦੀ ਸਰਕਾਰ ਹਰ ਜਗ੍ਹਾ ਇਹ ਖਬਰ ਪਲਾਂਟ ਕਰਦੀ ਕਿ ਆਮ ਆਦਮੀ ਪਾਰਟੀ ਕੋਲ ਨਸ਼ਾ ਤਸਕਰਾਂ ਤੋਂ ਕਰੋੜਾਂ ਰੁਪਏ ਆਉਂਦੇ ਹਨ ਅਤੇ ਆਮ ਆਦਮੀ ਪਾਰਟੀ ਸੈਂਕੜੇ ਸ਼ੈੱਲ ਕੰਪਨੀਆਂ ਚਲਾ ਰਹੀ ਸੀ, ਜਿਸ ਲਈ ਸਭ ਨੂੰ ਜੇਲ੍ਹ ਭੇਜਿਆ ਜਾਵੇਗਾ। ਇੱਕ-ਦੋ ਮਹੀਨਿਆਂ ਤੱਕ ਬੱਸ ਇਹੀ ਚੱਲਦਾ ਰਹਿੰਦਾ ਕਿ ਉਹ ਕਿਹੜੀ ਕੰਪਨੀ ਹੈ, ਕਿਸ ਦੇ ਨਾਮ ਹੈ, ਪੈਸਾ ਕਿੱਥੋਂ ਆਇਆ, ਪੈਸਾ ਕਿੱਥੇ ਗਿਆ ਅਤੇ ਆਮ ਆਦਮੀ ਪਾਰਟੀ ਨੂੰ ਚੋਣਾਂ ਹਰਾਉਣ ਲਈ ਭਾਜਪਾ ਦੀ ਸਰਕਾਰ ਪੂਰੀ ਸਾਜ਼ਿਸ਼ ਰਚਦੀ।
ਸੌਰਭ ਭਾਰਦਵਾਜ ਨੇ ਦੱਸਿਆ ਕਿ 19 ਜੁਲਾਈ ਤੋਂ ਲੈ ਕੇ 15 ਸਤੰਬਰ ਤੱਕ ਆਮ ਆਦਮੀ ਪਾਰਟੀ ਦੇ ਰਾਸ਼ਟਰੀ ਦਫਤਰ (ਜਿਸ ਦਾ ਪਤਾ 1, ਕੈਨਿੰਗ ਲੇਨ ਏਰੀਆ, ਨਵੀਂ ਦਿੱਲੀ ਹੈ) ਦੇ ਪਤੇ ’ਤੇ 58 ਬਿਜ਼ਨਸ ਅਤੇ ਬਾकायदा ਉਨ੍ਹਾਂ ਦੀ ਜੀਐੱਸਟੀ ਰਜਿਸਟ੍ਰੇਸ਼ਨ ਕੀਤੀ ਗਈ ਹੈ। ਜੋ ਲੋਕ ਬਿਜ਼ਨਸ ਕਰਦੇ ਹਨ, ਉਹ ਜਾਣਦੇ ਹਨ ਕਿ ਜੀਐੱਸਟੀ ਰਜਿਸਟ੍ਰੇਸ਼ਨ ਆਸਾਨੀ ਨਾਲ ਨਹੀਂ ਹੁੰਦੀ। ਜੇਕਰ ਆਮ ਆਦਮੀ ਪਾਰਟੀ ਦੇ ਦਫਤਰ ਦੇ ਪਤੇ ’ਤੇ ਰਜਿਸਟ੍ਰੇਸ਼ਨ ਕੀਤੀ ਗਈ ਹੈ, ਤਾਂ ਜੀਐੱਸਟੀ ਅਧਿਕਾਰੀ ਦੇ ਦਿਮਾਗ ਵਿੱਚ ਸਭ ਤੋਂ ਪਹਿਲਾਂ ਇਹ ਗੱਲ ਆਉਣੀ ਚਾਹੀਦੀ ਸੀ ਕਿ 1, ਕੈਨਿੰਗ ਲੇਨ ਇੱਕ ਸਰਕਾਰੀ ਬੰਗਲਾ ਹੈ ਅਤੇ ਇਸ ਵਿੱਚ ਕੋਈ ਪ੍ਰਾਈਵੇਟ ਕੰਪਨੀ ਜਾਂ ਬਿਜ਼ਨਸ ਕਿਵੇਂ ਰਜਿਸਟਰ ਹੋ ਸਕਦਾ ਹੈ? ਨਾ ਕੋਈ ਇਸ ਜਗ੍ਹਾ ਨੂੰ ਖਰੀਦ ਸਕਦਾ ਹੈ ਅਤੇ ਨਾ ਕੋਈ ਇਸ ਨੂੰ ਕਿਰਾਏ ’ਤੇ ਦੇ ਸਕਦਾ ਹੈ, ਤਾਂ ਪਹਿਲੀ ਨਜ਼ਰੇ ਇਹ ਹੋ ਹੀ ਨਹੀਂ ਸਕਦਾ ਸੀ।
ਸੌਰਭ ਭਾਰਦਵਾਜ ਨੇ ਕਿਹਾ ਕਿ ਬਿਜ਼ਨਸ ਰਜਿਸਟਰ ਕਰਦੇ ਸਮੇਂ ਚਲਾਉਣ ਵਾਲੇ ਦੇ ਆਧਾਰ ਕਾਰਡ ਦਾ ਓਟੀਪੀ ਅਥੈਂਟੀਕੇਸ਼ਨ ਕਰਨਾ ਪੈਂਦਾ ਹੈ। ਜਗ੍ਹਾ ਆਪਣੀ ਦਿਖਾਉਣ ਲਈ ਪਾਣੀ ਜਾਂ ਬਿਜਲੀ ਦਾ ਬਿੱਲ ਅਤੇ ਪ੍ਰਾਪਰਟੀ ਟੈਕਸ ਆਪਣੇ ਨਾਮ ’ਤੇ ਦਿਖਾਉਣਾ ਪੈਂਦਾ ਹੈ। ਜੇਕਰ ਜਗ੍ਹਾ ਕਿਰਾਏ ਦੀ ਦਿਖਾਈ ਜਾਂਦੀ ਹੈ, ਤਾਂ ਮਕਾਨ ਮਾਲਕ ਦਾ ਰੈਂਟ ਐਗਰੀਮੈਂਟ, ਬਿਜਲੀ ਦਾ ਬਿੱਲ ਅਤੇ ਐੱਨਓਸੀ ਦਿਖਾਉਣੀ ਪੈਂਦੀ ਹੈ। ਇਸ ਤੋਂ ਇਲਾਵਾ ਕਾਰੋਬਾਰੀ ਸਥਾਨ (ਪਲੇਸ ਆਫ ਬਿਜ਼ਨਸ) ਦੇ ਬਾਹਰ ਬਿਜ਼ਨਸ ਦਾ ਬੋਰਡ ਲਗਾ ਕੇ ਇੱਕ ਫੋਟੋ ਵੀ ਖਿੱਚਣੀ ਪੈਂਦੀ ਹੈ ਕਿ ਮੇਰਾ ਕੰਮ-ਧੰਦਾ ਇੱਥੇ ਚੱਲਦਾ ਹੈ। ਅਜਿਹੇ ਵਿੱਚ ਕੇਂਦਰ ਸਰਕਾਰ ਤੋਂ ਸਾਡਾ ਸਿੱਧਾ ਸਵਾਲ ਹੈ ਕਿ ਇਹ 58 ਬਿਜ਼ਨਸ ਆਮ ਆਦਮੀ ਪਾਰਟੀ ਦੇ ਰਾਸ਼ਟਰੀ ਦਫਤਰ ਦੇ ਪਤੇ ’ਤੇ ਕਿਵੇਂ ਰਜਿਸਟਰ ਹੋ ਗਏ?
ਸੌਰਭ ਭਾਰਦਵਾਜ ਨੇ ਅੱਗੇ ਦੱਸਿਆ ਕਿ ਇਹ ਤਮਾਮ 58 ਬਿਜ਼ਨਸ ਇਸੇ ਪਤੇ ’ਤੇ ਰਜਿਸਟਰਡ ਹਨ। ਜਿਵੇਂ ਇੱਕ ਜੀਐੱਸਟੀ ਨੰਬਰ 07ਏਐੱਚਕੇਪੀਸੀ920ਐੱਫ3ਜੈੱਡਜੈੱਡ ਹੈ, ਜਿਸ ਦਾ ਲੀਗਲ ਨਾਮ ਵਿਕਾਸ ਚੌਧਰੀ ਅਤੇ ਟ੍ਰੇਡ ਨਾਮ ਪ੍ਰਿਯੰਕਾ ਹੈ। ਇਸੇ ਤਰ੍ਹਾਂ ਆਸ਼ਾ ਐਂਟਰਪ੍ਰਾਈਜ਼ਿਜ਼, ਮੁਹੰਮਦ ਅਹਿਮਦ, ਫੈਜ਼ਾਨ ਅਹਿਮਦ, ਮੁਹੰਮਦ ਅਸਦ ਕੁਰੈਸ਼ੀ, ਅਫਜ਼ਲ, ਮੁਹੰਮਦ ਦਿਲਸ਼ਾਦ, ਸਾਫੀਆ ਖਾਨਮ, ਸੀਮਾ ਪਰਵੀਨ, ਕਾਸ਼ਿਫ ਸਿੱਦੀਕੀ, ਸਰਫਰਾਜ਼ ਅਤੇ ਮੁਹੰਮਦ ਫੈਜ਼ਾਨ ਜਿਹੇ ਨਾਵਾਂ ਨਾਲ ਇਹ ਰਜਿਸਟ੍ਰੇਸ਼ਨਾਂ ਹੋਈਆਂ ਹਨ ਅਤੇ ਇਨ੍ਹਾਂ ਦਾ ਕੰਮ-ਧੰਦਾ ਇੰਪੋਰਟ-ਐਕਸਪੋਰਟ ਲਿਖਿਆ ਗਿਆ ਹੈ। ਜੀਐੱਸਟੀ ਨੰਬਰ ਦਿੰਦੇ ਸਮੇਂ ਅਕਸਰ ਜੀਐੱਸਟੀ ਅਧਿਕਾਰੀ ਕਾਰੋਬਾਰੀ ਸਥਾਨ ਦੀ ਫਿਜ਼ੀਕਲ ਵੈਰੀਫਿਕੇਸ਼ਨ ਕਰਨ ਵੀ ਆਉਂਦਾ ਹੈ।
ਸੌਰਭ ਭਾਰਦਵਾਜ ਨੇ ਸਵਾਲ ਕੀਤਾ ਕਿ ਕੀ ਕੇਂਦਰ ਸਰਕਾਰ ਅੱਜ ਇੰਨੀ ਡਿੱਗ ਗਈ ਹੈ ਕਿ ਸਿਰਫ਼ ਇੱਕ ਪਾਰਟੀ ਨੂੰ ਚੋਣਾਂ ਹਰਾਉਣ ਲਈ ਕੁਝ ਵੀ ਝੂਠ ਚਲਾਏਗੀ? ਉਨ੍ਹਾਂ ਨੇ ਬੱਸ ਇੱਕ ਮਹੀਨਾ ਹੀ ਝੂਠ ਚਲਾਉਣਾ ਹੈ, ਉਸ ਤੋਂ ਅੱਗੇ ਜਾਂਚ ਤਾਂ ਕਰਨੀ ਨਹੀਂ ਕਿਉਂਕਿ ਏਜੰਸੀਆਂ ਉਨ੍ਹਾਂ ਦੀਆਂ ਹੀ ਹਨ। ਉਹ ਐੱਸਆਈਟੀ ਬਣਾਉਂਦੇ, ਈਡੀ ਕੇਸ ਦਰਜ ਕਰਦੀ, ਸੀਬੀਆਈ ਨੂੰ ਕੇਸ ਭੇਜਿਆ ਜਾਂਦਾ ਅਤੇ ਗ੍ਰਹਿ ਮੰਤਰੀ ਕਹਿੰਦੇ ਕਿ ਪੰਜਾਬ ਇੱਕ ਸਰਹੱਦੀ ਸੂਬਾ (ਬਾਰਡਰ ਸਟੇਟ) ਹੈ, ਇਹ ਦੇਸ਼ ਲਈ ਸੰਵੇਦਨਸ਼ੀਲ ਮਾਮਲਾ ਹੈ। ਇੱਕ ਮਹੀਨੇ ਤੱਕ ਸਨਸਨੀਖੇਜ਼ ਖੁਲਾਸੇ ਕੀਤੇ ਜਾਂਦੇ ਅਤੇ ਭਾਜਪਾ ਆਮ ਆਦਮੀ ਪਾਰਟੀ ਨੂੰ ਚੋਣਾਂ ਹਰਾ ਦਿੰਦੀ। ਫਿਰ ਲੋਕ ਮੀਡੀਆ ਵਿੱਚ ਲੇਖ ਲਿਖਦੇ ਕਿ ਆਮ ਆਦਮੀ ਪਾਰਟੀ ਦੇ ਪੰਜਾਬ ਹਾਰਨ ਦੇ ਕੀ ਕਾਰਨ ਰਹੇ, ਪਰ ਕੋਈ ਇਹ ਨਹੀਂ ਲਿਖਦਾ ਕਿ ਇਸ ਦਾ ਸਭ ਤੋਂ ਵੱਡਾ ਕਾਰਨ ਬੇਈਮਾਨੀ ਹੈ।
ਸੌਰਭ ਭਾਰਦਵਾਜ ਨੇ ਦੱਸਿਆ ਕਿ ਇਨ੍ਹਾਂ ਰਜਿਸਟ੍ਰੇਸ਼ਨਾਂ ਦੀ ਪੂਰੀ ਡਿਟੇਲ, ਤਾਰੀਖ਼ ਅਤੇ ਆਧਾਰ ਵੈਰੀਫਿਕੇਸ਼ਨ ਜੀਐੱਸਟੀ ਦੀ ਵੈੱਬਸਾਈਟ ’ਤੇ ਮੌਜੂਦ ਹੈ। ਆਧਾਰ ਕਾਰਡ ਪਾਉਂਦੇ ਸਮੇਂ ਜੋ ਓਟੀਪੀ ਮੰਗਿਆ ਜਾਂਦਾ ਹੈ, ਉਹ ਵੀ ਵੈਰੀਫਾਈ ਕੀਤਾ ਗਿਆ ਹੈ। ਕੇਂਦਰ ਸਰਕਾਰ ਜਵਾਬ ਦੇਵੇ ਕਿ ਇਹ ਕੀ ਸਾਜ਼ਿਸ਼ ਚੱਲ ਰਹੀ ਸੀ ਅਤੇ ਜਾਂਚ ਕਰਕੇ ਦੱਸੇ ਕਿ ਇਸ ਵਿੱਚ ਕਿਹੜੇ ਲੋਕ ਸ਼ਾਮਲ ਹਨ? ਕਿਹੜੇ ਸਰਵਰ ਅਤੇ ਕੰਪਿਊਟਰਾਂ ਤੋਂ ਰਜਿਸਟ੍ਰੇਸ਼ਨ ਦੀ ਇਹ ਐਕਸਰਸਾਈਜ਼ ਚੱਲ ਰਹੀ ਸੀ ਅਤੇ ਕਿਹੜੇ ਅਫਸਰ ਇੱਥੇ ਵੈਰੀਫਿਕੇਸ਼ਨ ਕਰਨ ਆਏ ਸਨ? ਜੁਲਾਈ 2026 ਤੋਂ ਸਤੰਬਰ 2026 ਦੇ ਵਿਚਕਾਰ ਸਿਰਫ਼ ਦੋ ਮਹੀਨਿਆਂ ਵਿੱਚ ਇਹ 58 ਬਿਜ਼ਨਸ ਰਜਿਸਟਰ ਹੋਏ ਹਨ। ਇਸ ਦੀ ਸ਼ਿਕਾਇਤ ਅਸੀਂ ਸ਼ਨੀਵਾਰ, 19 ਸਤੰਬਰ ਨੂੰ ਪ੍ਰਿੰਸੀਪਲ ਚੀਫ ਕਮਿਸ਼ਨਰ ਜੀਐੱਸਟੀ, ਕਮਿਸ਼ਨਰ ਆਫ ਟ੍ਰੇਡ ਐਂਡ ਟੈਕਸੇਜ਼ ਅਤੇ ਨਵੀਂ ਦਿੱਲੀ ਦੇ ਪੁਲਿਸ ਕਮਿਸ਼ਨਰ ਨੂੰ ਦੇ ਦਿੱਤੀ ਹੈ, ਪਰ ਅਜੇ ਤੱਕ ਉਨ੍ਹਾਂ ਵੱਲੋਂ ਕੋਈ ਜਵਾਬ ਨਹੀਂ ਆਇਆ ਹੈ।
RSS FEED