ਭਾਜਪਾ ਪੰਜਾਬ ਵਿਸਾਖੀ ਦਾ ਤਿਉਹਾਰ ਤਖ਼ਤ ਸ੍ਰੀ ਦਮਦਮਾ ਸਾਹਿਬ ਵਿਖੇ ਮੱਥਾ ਟੇਕ ਕੇ ਅਤੇ ਸੇਵਾ ਕਾਰਜਾਂ ਨਾਲ ਮਨਾਏਗੀ

Apr13,2026 | Jagrati Lahar Bureau | Chandigarh

ਵਿਸਾਖੀ ਮੌਕੇ ਸੇਵਾ: ਭਾਜਪਾ ਪੰਜਾਬ ਤਖ਼ਤ ਸ੍ਰੀ ਦਮਦਮਾ ਸਾਹਿਬ ਵਿਖੇ ਮੱਥਾ ਟੇਕੇਗੀ, ਲੰਗਰ ਅਤੇ ਮੈਡੀਕਲ ਕੈਂਪ ਲਗਾਏਗੀ

ਵਿਸਾਖੀ ਦੇ ਮੌਕੇ ‘ਤੇ ਭਾਜਪਾ ਪੰਜਾਬ ਦਾ ਨੇਤ੍ਰਿਤਵ ਤਖ਼ਤ ਸ੍ਰੀ ਦਮਦਮਾ ਸਾਹਿਬ ਵਿਖੇ ਮੱਥਾ ਟੇਕ ਕੇ ਲੰਗਰ ਅਤੇ ਮੈਡੀਕਲ ਕੈਂਪਾਂ ਦਾ ਆਯੋਜਨ ਕਰੇਗਾ

ਵਿਸਾਖੀ ਦੇ ਪਵਿੱਤਰ ਮੌਕੇ ਤੇ ਭਾਰਤੀ ਜਨਤਾ ਪਾਰਟੀ (ਭਾਜਪਾ) ਪੰਜਾਬ ਦੀ ਸੀਨੀਅਰ ਲੀਡਰਸ਼ਿਪ, ਸੂਬਾ ਪ੍ਰਧਾਨ ਸੁਨੀਲ ਜਾਖੜ, ਕਾਰਜਕਾਰੀ ਸੂਬਾ ਪ੍ਰਧਾਨ ਅਸ਼ਵਨੀ ਸ਼ਰਮਾ ਦੀ ਅਗਵਾਈ ਹੇਠ ਤਖ਼ਤ ਸ੍ਰੀ ਦਮਦਮਾ ਸਾਹਿਬ ਵਿਖੇ ਮੱਥਾ ਟੇਕੇਗੀ । ਇਹ ਜਾਣਕਾਰੀ ਸੂਬਾ ਮੀਤ ਪ੍ਰਧਾਨ ਬਿਕਰਮ ਚੀਮਾ ਨੇ ਦਿੱਤੀ।

ਗੁਰੂ ਕੀ ਕਾਸ਼ੀ (ਤਲਵੰਡੀ ਸਾਬੋ) ਵਿੱਚ ਜਾਖੜ ਅਤੇ ਸ਼ਰਮਾ ਦੇ ਨਾਲ ਸਰਦਾਰ ਐਚ.ਐਸ. ਫੂਲਕਾ, ਸੰਸਦ ਮੈਂਬਰ ਸਤਨਾਮ ਸਿੰਘ ਸੰਧੂ, ਵਿਧਾਇਕ ਜੰਗੀ ਲਾਲ ਮਹਾਜਨ, ਸੂਬਾ ਅਹੁਦੇਦਾਰ, ਸਟੇਟ ਕੋਰ ਕਮੇਟੀ ਮੈਂਬਰ, ਸਾਬਕਾ ਵਿਧਾਇਕ, ਸਾਬਕਾ ਮੰਤਰੀ, ਸਾਬਕਾ ਸੰਸਦ ਮੈਂਬਰ ਅਤੇ ਹੋਰ ਸੀਨੀਅਰ ਆਗੂ ਵੀ ਮੌਜੂਦ ਰਹਿਣਗੇ।

ਤਖ਼ਤ ਸਾਹਿਬ ਤੇ ਮੱਥਾ ਟੇਕਣ ਅਤੇ ਕੀਰਤਨ ਸੁਣਨ ਤੋਂ ਬਾਅਦ ਭਾਜਪਾ ਦੇ ਆਗੂ ਸੇਵਾ ਭਾਵ ਨਾਲ ਦੋ ਥਾਵਾਂ — ਬਠਿੰਡਾ ਤੋਂ ਤਲਵੰਡੀ ਰੋਡ ਅਤੇ ਮੌੜ ਤੋਂ ਤਲਵੰਡੀ ਰੋਡ — ’ਤੇ ਲੰਗਰ ਸੇਵਾ ਕਰਣਗੇ।

ਸ਼ਰਧਾਲੂਆਂ ਦੀ ਸੁਵਿਧਾ ਲਈ ਭਾਜਪਾ ਪੰਜਾਬ ਵੱਲੋਂ ਬਠਿੰਡਾ–ਤਲਵੰਡੀ ਰੋਡ ਅਤੇ ਮੌੜ–ਤਲਵੰਡੀ ਰੋਡ ’ਤੇ ਦੋ ਮੈਡੀਕਲ ਕੈਂਪਾਂ ਦੇ ਨਾਲ ਦੋ ਲੰਗਰ ਵੀ ਲਗਾਏ ਜਾ ਰਹੇ ਹਨ।

ਚੀਮਾ ਨੇ ਕਿਹਾ ਕਿ ਵਿਸਾਖੀ ਦੇ ਇਸ ਪਵਿੱਤਰ ਮੌਕੇ ’ਤੇ ਸੇਵਾ ਅਤੇ ਸਮਾਜਿਕ ਭਲਾਈ ਦੀ ਭਾਵਨਾ ਨਾਲ ਭਾਜਪਾ ਪੰਜਾਬ ਲੋਕਾਂ ਦੀ ਸੇਵਾ ਲਈ ਵਚਨਬੱਧ ਹੈ।

ਸਾਰੇ ਲੀਡਰ ਸਭ ਤੋਂ ਪਹਿਲਾਂ ਗੁਰਮੇਹਰ ਰਿਜ਼ੋਰਟ ਮੌੜ (ਮੌੜ-ਤਲਵੰਡੀ ਰੋਡ) ‘ਤੇ ਇਕੱਠੇ ਹੋਣਗੇ, ਜਿੱਥੇ ਸੁਨੀਲ ਜਾਖੜ, ਅਸ਼ਵਨੀ ਸ਼ਰਮਾ ਅਤੇ ਐਚ.ਐਸ. ਫੂਲਕਾ ਮੀਡੀਆ ਨਾਲ ਗੱਲਬਾਤ ਕਰਨਗੇ। ਇਸ ਤੋਂ ਬਾਅਦ ਉਹ ਤਲਵੰਡੀ ਸਾਬੋ ਵੱਲ ਰਵਾਨਾ ਹੋਣਗੇ।

-Bjp-Punjab-To-Celebrate-Baisakhi-By-Paying-Obeisance-Followed-By-Sewa-At-Takht-Sri-Damdama-Sahib