ਮੋਹਾਲੀ ਜਿਲ੍ਹੇ ਵਿੱਚ ਬੰਦ ਦਾ ਮਿਲਿਆ ਜੁਲਿਆ ਅਸਰ

Feb16,2024 | Gurwinder Singh Mohali | Sas Nagar (mohali)

ਸ਼ਹਿਰ ਵਿੱਚ ਆਮ ਵਾਂਗ ਰਿਹਾ ਟ੍ਰੈਫਿਕ, ਲਾਂਡਰਾਂ ਵਿਖੇ ਚੱਕਾ ਜਾਮ ਕਾਰਨ ਵਾਹਨਾਂ ਦੀਆਂ ਕਤਾਰਾਂ ਲੱਗੀਆਂ ਮੋਹਾਲੀ, 16 ਫਰਵਰੀ{ਗੁਰਵਿੰਦਰ ਸਿੰਘ} ਸੰਯੁਕਤ ਕਿਸਾਨ ਮੋਰਚਾ ਵਲੋਂ ਅੱਜ ਦੁਪਹਿਰ 12 ਵਜੇ ਤੋਂ 4 ਵਜੇ ਤਕ ਭਾਰਤ ਬੰਦ ਦੇ ਸੱਦੇ ਦੌਰਾਨ ਮੁਹਾਲੀ ਜ਼ਿਲ੍ਹੇ ਵਿੱਚ ਮਿਲਿਆ ਜੁਲਿਆ ਅਸਰ ਵੇਖਣ ਵਿੱਚ ਆਇਆ। ਇਸ ਦੌਰਾਨ ਜਿੱਥੇ ਖਰੜ, ਕੁਰਾਲੀ, ਡੇਰਾਬਸੀ, ਲਾਲੜੂ ਵਿੱਚ ਵੱਡੀ ਗਿਣਤੀ ਦੁਕਾਨਾਂ ਬੰਦ ਰਹੀਆਂ ਉੱਥੇ ਮੁਹਾਲੀ ਸ਼ਹਿਰ ਵਿੱਚ ਬਾਜਾਰ ਖੁੱਲੇ ਰਹੇ ਅਤੇ ਟ੍ਰੈਫਿਕ ਵੀ ਆਮ ਵਾਂਗ ਰਿਹਾ। ਇਸ ਦੌਰਾਨ ਬਸਾਂ ਬੰਦ ਰਹੀਆਂ ਜਦੋਂ ਕਿ ਪੈਟਰੋਲ ਪੰਪ ਆਮ ਵਾਂਗ ਖੁੱਲੇ ਰਹੇ। ਇਸ ਦੌਰਾਨ ਸੜਕਾਂ ਤੇ ਆਮ ਦੀ ਤਰ੍ਹਾਂ ਟ੍ਰੈਫਿਕ ਚੱਲਦਾ ਰਿਹਾ ਅਤੇ ਕਿਸੇ ਤਰ੍ਹਾਂ ਦੀ ਕੋਈ ਰੋਕ ਟੋਕ ਨਹੀਂ ਦਿਖੀ। ਮੁਹਾਲੀ ਵਿੱਚ ਗੁਰੂਦੁਆਰਾ ਸਿੰਘ ਸ਼ਹੀਦਾਂ ਦੇ ਸਾਮ੍ਹਣੇ ਕਿਸਾਨ ਯੂਨੀਅਨਾਂ ਅਤੇ ਹੋਰਨਾਂ ਜੱਥੇਬੰਦੀਆਂ ਵਲੋਂ ਸੜਕ ਤੇ ਜਾਮ ਲਗਾਇਆ ਗਿਆ ਅਤੇ ਇਸ ਦੌਰਾਨ ਟ੍ਰੈਫਿਕ ਬਦਲਵੇਂ ਰਾਹੀ ਤੋਂ ਲੰਘਦਾ ਰਿਹਾ। ਖਰੜ ਵਿੱਚ ਬੰਦ ਦਾ ਅਸਰ ਕਾਫੀ ਰਿਹਾ ਅਤੇ ਉੱਥੇ ਕਾਫੀ ਦੁਕਾਨਾਂ ਬੰਦ ਰਹੀਆਂ। ਇਸ ਦੌਰਾਨ ਕਿਸਾਨ ਯੂਨੀਅਨਾਂ ਵਲੋਂ ਬਸ ਅੱਡੇ ਤੇ ਚੱਕਾ ਜਾਮ ਕੀਤਾ ਗਿਆ ਜਿਸ ਕਾਰਨ ਇੱਥੇ ਭਾਰੀ ਜਾਮ ਲੱਗ ਗਿਆ। ਇਸ ਦੌਰਾਨ ਕੇਂਦਰ ਸਰਕਾਰ ਦੇ ਖਿਲਾਫ ਨਾਹਰੇਬਾਜੀ ਕੀਤੀ ਗਈ। ਇੱਥੇ ਭਾਰੀ ਗਿਣਤੀ ਵਿੱਚ ਪੁਲੀਸ ਫੋਰਸ ਨੂੰ ਤਾਇਨਾਤ ਕੀਤਾ ਗਿਆ। ਲਾਂਡਰਾ ਚੌਂਕ ਤੇ ਵੀ ਚੱਕਾ ਜਾਮ ਰਿਹਾ ਜਿਸ ਕਾਰਨ ਦੋਵੇਂ ਪਾਸੇ ਵਾਹਨਾਂ ਦੀਆਂ ਲੰਬੀਆਂ ਲਾਈਨਾਂ ਲੱਗ ਗਈਆਂ ਅਤੇ ਟ੍ਰੈਫਿਕ ਜਾਮ ਹੋਣ ਕਾਰਨ ਆਮ ਲੋਕਾਂ ਨੂੰ ਪਰੇਸ਼ਾਨ ਹੋਣਾ ਪਿਆ। ਕੁਰਾਲੀ ਵਿੱਚ ਬੰਦ ਦਾ ਪੂਰਾ ਅਸਰ ਨਜਰ ਆਇਆ ਅਤੇ ਬਾਜਾਰ ਬੰਦ ਰਹੇ। ਡੇਰਾਬਸੀ ਅਤੇ ਲਾਲੜੂ ਵਿੱਚ ਵੀ ਬੰਦ ਦਾ ਕਾਫੀ ਅਸਰ ਵੇਖਣ ਵਿੱਚ ਆਇਆ ਅਤੇ ਦੁਕਾਨਾਂ ਬੰਦ ਰਹੀਆਂ।

Kisan-Andolan-13-Feb-2024-Delhi-Chalo