ਪੰਜਾਬੀ ਸਾਹਿਤ ਅਕਾਡਮੀ ਲੁਧਿਆਣਾ ਵਲੋਂ ਗੈਸਟ ਫੈਕਲਟੀ ਦੀ ਇੰਟਰਵਿਊ ਲੈਣ ਦਾ ਫੁਰਮਾਨ ਰੱਦ ਕਰਨ ਦੀ ਮੰਗ

Aug19,2024 | Gautam Jalandhari | Ludhiana

ਪੰਜਾਬੀ ਸਾਹਿਤ ਅਕਾਡਮੀ, ਲੁਧਿਆਣਾ ਨੇ ਪਿਛਲੇ ਦਿਨੀਂ ਪੰਜਾਬੀ ਯੂਨੀਵਰਸਿਟੀ ਪਟਿਆਲਾ
ਦੇ ਕਾਰਜਕਾਰੀ ਵੀ.ਸੀ. ਵਲੋਂ ਗੈਸਟ ਫੈਕਲਟੀ ਅਧਿਆਪਕਾਂ ਦੀ ਮੁੜ ਇੰਟਰਵਿਊ ਲੈਣ ਦਾ
ਫੁਰਮਾਨ ਰੱਦ ਕਰਨ ਅਤੇ ਇਹਨਾਂ ਅਧਿਆਪਕਾਂ ਨੂੰ ਪਹਿਲਾਂ ਦੀ ਤਰ੍ਹਾਂ ਨਿਰਧਾਰਿਤ ਤਨਖਾਹ
ਉੱਪਰ ਬਿਨਾਂ ਇੰਟਰਵਿਊ ਪੂਰੇ ਸਾਲ ਲਈ ਕੰਮ ਕਰਨ ਦੇ ਹੁਕਮ ਦੀ ਨਿਰੰਤਰਤਾ ਬਣਾਈ ਰੱਖਣ
ਦੀ ਮੰਗ ਕੀਤੀ ਹੈ ਅਤੇ ਆਪਣੀ ਇਸ ਜਾਇਜ਼ ਮੰਗ ਲਈ ਸੰਘਰਸ਼ ਕਰ ਰਹੇ ਗੈਸਟ ਫੈਕਲਟੀ
ਅਧਿਆਪਕਾਂ ਦੇ ਸੰਘਰਸ਼ ਦੀ ਹਮਾਇਤ ਕਰਨ ਦਾ ਐਲਾਨ ਕੀਤਾ ਹੈ। ਸੰਸਥਾ ਦੇ ਪ੍ਰਧਾਨ ਡਾ.
ਸਰਬਜੀਤ ਸਿੰਘ, ਸੀਨੀਅਰ ਮੀਤ ਪ੍ਰਧਾਨ ਡਾ. ਪਾਲ ਕੌਰ, ਜਨਰਲ ਸਕੱਤਰ ਡਾ. ਗੁਲਜ਼ਾਰ ਸਿੰਘ
ਪੰਧੇਰ, ਮੀਤ ਪ੍ਰਧਾਨ ਜਸਪਾਲ ਮਾਨਖੇੜਾ, ਡਾ. ਅਰਵਿੰਦਰ ਕੌਰ ਕਾਕੜਾ, ਡਾ. ਗੁਰਚਰਨ ਕੌਰ
ਕੋਚਰ, ਤ੍ਰੈਲੋਚਨ ਲੋਚੀ, ਡਾ. ਹਰਵਿੰਦਰ ਸਿੰਘ, ਸਕੱਤਰ ਜਸਵੀਰ ਝੱਜ, ਡਾ.ਹਰੀ ਸਿੰਘ
ਜਾਚਕ ਅਤੇ ਸਮੁੱਚੇ ਪ੍ਰਬੰਧਕੀ ਬੋਰਡ ਨੇ ਇਹਨਾਂ ਗੈਸਟ ਫੈਕਲਟੀ ਅਧਿਆਪਕਾਂ ਦੇ ਹੱਕ ਵਿਚ
ਆਵਾਜ਼ ਬੁਲੰਦ ਕਰਦੇ ਹੋਏ ਕਿਹਾ ਕਿ ਲੋੜ ਤਾਂ ਇਸ ਗੱਲ ਦੀ ਸੀ ਕਿ ਲੰਮੇ ਸਮੇਂ ਤੋਂ
ਕਾਰਜਸ਼ੀਲ ਇਹਨਾਂ ਅਧਿਆਪਕਾਂ ਦੀਆਂ ਸੇਵਾਵਾਂ ਨੂੰ ਪੂਰੇ ਪੇ ਸਕੇਲ ਮੁਤਾਬਕ ਪੱਕਾ ਕੀਤਾ
ਜਾਂਦਾ, ਪਰ ਇਸ ਦੇ ਉਲਟ ਯੂਨੀਵਰਸਿਟੀ ਪ੍ਰਸ਼ਾਸਨ ਪਹਿਲਾਂ ਤੋਂ ਹੀ ਤੈਅ ਨਿਯਮਾਂ ਨੂੰ
ਤਾਕ ਤੇ ਰੱਖ ਕੇ ਇਹਨਾਂ ਅਧਿਆਪਕਾਂ ਦੀ ਰੋਜ਼ੀ ਰੋਟੀ ਤੇ ਹਮਲਾ ਕਰ ਰਿਹਾ ਹੈ। ਜ਼ਿਕਰਯੋਗ
ਹੈ ਕਿ ਪੰਜਾਬੀ ਯੂਨੀਵਰਸਿਟੀ ਵਲੋਂ ਪੇਂਡੂ ਖੇਤਰਾਂ ਤੱਕ ਸਿੱਖਿਆ ਸੇਵਾਵਾਂ ਪਹੁੰਚਾਉਣ
ਲਈ ਦੋ ਖੇਤਰੀ ਕੇਂਦਰ, ਪੰਜ ਨੇਬਰਹੁੱਡ ਕੈਂਪਸ ਅਤੇ ਤੇਰਾਂ ਕਾਂਸਟੀਚਿਊਟ ਕਾਲਜ ਸ਼ੁਰੂ
ਕੀਤੇ ਗਏ ਸਨ। ਇਸ ਵਕਤ ਇਹਨਾਂ ਕਾਲਜਾਂ ਦਾ ਜ਼ਿਆਦਾਤਰ ਕੰਮ ਇਹ ਗੈਸਟ ਫੈਕਲਟੀ ਪ੍ਰੋਫ਼ੈਸਰ
ਹੀ ਚਲਾ ਰਹੇ ਹਨ। ਇਹ ਸਾਰੇ ਪ੍ਰੋਫ਼ੈਸਰ ਯੂ. ਜੀ. ਸੀ., ਪੰਜਾਬ ਸਰਕਾਰ ਅਤੇ ਪੰਜਾਬੀ
ਯੂਨੀਵਰਸਿਟੀ ਪਟਿਆਲਾ ਦੀਆਂ ਉਹ ਸਾਰੀਆਂ ਸ਼ਰਤਾਂ ਪੂਰੀਆਂ ਕਰਦੇ ਹਨ ਜੋ ਪ੍ਰੋਫ਼ੈਸਰ ਲੱਗਣ
ਦੇ ਲਈ ਯੂ. ਜੀ. ਸੀ. ਵਲੋਂ ਨਿਰਧਾਰਿਤ ਕੀਤੀਆਂ ਗਈਆਂ ਹਨ। ਸਤੰਬਰ 2022 ਤੋਂ ਪਹਿਲਾਂ
ਇਹਨਾਂ ਪ੍ਰੋਫ਼ੈਸਰਾਂ ਨੂੰ ਪ੍ਰਤੀ ਲੈਕਚਰ ਦੇ ਹਿਸਾਬ ਨਾਲ 30,000/-ਮਹੀਨਾ ਤਨਖਾਹ
ਮਿਲਦੀ ਸੀ, ਜੋ ਕੇ ਸਿਰਫ਼ ਸੱਤ ਤੋਂ ਅੱਠ ਮਹੀਨੇ ਮਿਲਦੀ ਸੀ, ਪਰ ਇਹਨਾਂ ਪ੍ਰੋਫ਼ੈਸਰਾਂ
ਤੋਂ ਕੰਮ ਪੂਰਾ ਸਾਲ ਕਰਵਾਇਆ ਜਾਂਦਾ ਸੀ। ਇਸ ਤੋਂ ਬਾਅਦ ਇਹਨਾਂ ਗੈਸਟ ਫੈਕਲਟੀ
ਅਧਿਆਪਕਾਂ ਦੇ ਸੰਘਰਸ਼ ਕਰਕੇ ਸਤੰਬਰ 2022 ਵਿਚ ਪੰਜਾਬੀ ਯੂਨੀਵਰਸਿਟੀ ਪਟਿਆਲਾ ਵਲੋਂ
ਇਹਨਾਂ ਪ੍ਰੋਫੈਸਰਾਂ ਨੂੰ 12 ਮਹੀਨੇ ਤਨਖਾਹ ਦੇਣ ਦਾ ਪ੍ਰਸਤਾਵ ਸਿੰਡੀਕੇਟ ਵਿਚ ਪਾਸ
ਕੀਤਾ। ਲੈਕਚਰ ਅਧਾਰਿਤ ਤਨਖਾਹ 35,000/-ਰੁਪਏ ਪ੍ਰਤੀ ਮਹੀਨਾ ਕਰ ਦਿਤੀ ਅਤੇ ਗੈਰ
ਅਧਿਆਪਨ ਮਹੀਨਿਆਂ ਵਿਚ ਪ੍ਰਤੀ ਮਹੀਨਾ 20,000/-ਰੁਪਏ ਤਨਖਾਹ ਕਰ ਦਿਤੀ। ਪਰ ਕੁਝ ਦਿਨ
ਪਹਿਲਾਂ ਯੂਨੀਵਰਸਿਟੀ ਵਲੋਂ ਇਹ ਨੋਟਿਸ ਜਾਰੀ ਕੀਤਾ ਗਿਆ ਕਿ ਖੇਤਰੀ ਕੇਂਦਰ/ਨੇਬਰਹੁੱਡ
ਕੈਂਪਸ ਅਤੇ ਕਾਂਸਟੀਚਿਊਟ ਵਿਚ ਕੰਮ ਕਰਦੇ ਪ੍ਰੋਫੈਸਰਾਂ ਨੂੰ ਨੌਕਰੀਆਂ ਖੁੱਸਣ ਦਾ ਡਰ
ਬਣ ਗਿਆ ਹੈ। ਪਿਛਲੇ ਦਿਨਾਂ ਤੋਂ ਇਹਨਾਂ ਗੈਸਟ ਫੈਕਲਟੀ ਅਧਿਆਪਕਾਂ ਨੇ ਯੂਨੀਵਰਸਿਟੀ
ਪ੍ਰਸ਼ਾਸਨ ਦੇ ਇਸ ਗ਼ੈਰ ਮਨੁੱਖੀ ਫੁਰਮਾਨਾਂ ਖ਼ਿਲਾਫ਼ ਸੰਘਰਸ਼ ਵਿੱਢਿਆ ਹੋਇਆ ਹੈ। ਪੰਜਾਬੀ
ਸਾਹਿਤ ਅਕਾਡਮੀ, ਲੁਧਿਆਣਾ ਨੇ ਇਸ ਸੰਘਰਸ਼ ਦੀ ਪੁਰਜ਼ੋਰ ਹਮਾਇਤ ਕਰਦੇ ਹੋਏ ਕਿਹਾ ਕਿ
ਜੇਕਰ ਇਹ ਫੁਰਮਾਨ ਵਾਪਿਸ ਨਹੀਂ ਲਿਆਂ ਜਾਂਦਾ ਤਾਂ ਅਕਾਡਮੀ ਇਹਨਾਂ ਅਧਿਆਪਕਾਂ ਦੇ
ਸੰਘਰਸ਼ ਵਿਚ ਸ਼ਾਮਿਲ ਹੋਵੇਗੀ ਅਤੇ ਭਰਾਤਰੀ ਜਥੇਬੰਦੀਆਂ ਨੂੰ ਵੀ ਇਹਨਾਂ ਦੇ ਸਮਰਥਨ ਵਿਚ
ਇਕਜੁਟ ਕਰਨ ਲਈ ਅਪੀਲ ਕਰੇਗੀ।