ਗਮਾਡਾ ਵੱਲੋਂ ਬਲੌਂਗੀ ਵਿੱਚ ਅਣਅਧਿਕਾਰਤ ਪੀ.ਜੀ. ਨੂੰ ਖਾਲੀ ਕਰਨ ਦੇ ਹੁਕਮ
ਪੀ ਜੀ ਮਾਲਕਾਂ ਨੂੰ ਭੇਜੇ ਨੋਟਿਸ ਬਿਜਲੀ ਮਹਿਕਮੇ ਨੇ 13 ਪੀ ਜੀ ਦੇ ਬਿਜਲੀ ਕੁਨੈਕਸ਼ਨ ਕੱਟੇ
ਮੋਹਾਲੀ, 25 ਜੁਲਾਈ (ਗੁਰਵਿੰਦਰ ਸਿੰਘ) ਪੰਜਾਬ ਐਂਡ ਹਰਿਆਣਾ ਹਾਈ ਕੋਰਟ ਵੱਲੋਂ ਬਲੌਂਗੀ ਦੇ ਵਸਨੀਕ ਬਲਕਾਰ ਸਿੰਘ ਵਲੋਂ ਪਾਏ ਅਣਅਧਿਕਾਰਤ ਪੀ ਜੀ ਕੇਸ ਸਬੰਧੀ ਮਾਣਯੋਗ ਅਦਾਲਤ ਵਲੋਂ ਕਾਰਵਾਈ ਕਰਨ ਦੇ ਹੁਕਮ ਜ਼ਾਰੀ ਕੀਤੇ ਗਏ ਸਨ ਅਤੇ ਗਮਾਡਾ ਵਲੋਂ ਵੀ ਅਣ ਅਧਿਕਾਰਤ ਪੀ ਜੀ ਨੂੰ ਨੋਟਿਸ ਵੀ ਜਾਰੀ ਕੀਤੇ ਗਏ ਸਨ ਪਰ ਅਣਅਧਿਕਾਰਤ ਪੀ. ਜੀ ਦੇ ਮਾਲਕਾਂ ਵਲੋਂ ਉਸਾਰੀਆਂ ਨੂੰ ਮੁਕੰਮਲ ਕਰ ਲਿਆ ਗਿਆ ਸੀ। ਅੱਜ ਬਿਜਲੀ ਵਿਭਾਗ ਵੱਲੋਂ ਲੱਗਭਗ 13 ਪੀ ਜੀ ਦੇ ਬਿਜਲੀ ਦੇ ਕੁਨੇਕਸ਼ਨ ਕੱਟ ਦਿਤੇ ਗਏ। ਜ਼ਿਕਰਯੋਗ ਹੈ ਕਿ ਗਮਾਡਾ ਵਲੋਂ ਇਹਨਾਂ ਪੀ ਜੀ ਨੂੰ ਨੋਟਿਸ ਵੀ ਜਾਰੀ ਕੀਤੇ ਗਏ ਅਤੇ ਜਿਸ ਵਿੱਚ ਲਿਖਿਆ ਹੈ ਕਿ ਪੰਜਾਬ ਐਂਡ ਹਰਿਆਣਾ ਹਾਈਕੋਰਟ ਦੇ ਹੁਕਮਾਂ ਦੀ ਪਾਲਣਾ ਕਰਦੇ ਹੋਏ ਅਣਅਧਿਕਾਰਤ ਪੀ ਜੀ ਨੂੰ ਢਾਹੁਣ ਦੀ ਕਾਰਵਾਈ ਕੀਤੀ ਜਾਣੀ ਹੈ ਜਿਸ ਲਈ 24 ਘੰਟੇ ਦੇ ਅੰਦਰ ਪੀ ਜੀ ਨੂੰ ਖਾਲੀ ਕਰਨ ਦੇ ਹੁਕਮ ਜਾਰੀ ਕੀਤੇ ਗਏ ਹਨ। ਇਹਨਾਂ ਨੋਟਿਸਾਂ ਵਿੱਚ ਲਿਖਿਆ ਹੈ ਜੇ ਕਾਰਵਾਈ ਦੌਰਾਨ ਕਿਸੇ ਦੀ ਜਾਨ ਮਾਲ ਦਾ ਨੁਕਸਾਨ ਹੁੰਦਾ ਹੈ ਤੇ ਉਸ ਦੀ ਜਿੰਮੇਵਾਰੀ ਪੀ ਜੀ ਦੇ ਮਾਲਕ ਦੀ ਹੋਵੇਗੀ ਅਤੇ ਮਾਲਕ ਉਤੇ ਸਖਤ ਤੋਂ ਸਖਤ ਕਾਰਵਾਈ ਕੀਤੀ ਜਾਵੇਗੀ।
ਇਸ ਦੌਰਾਨ ਇੱਕ ਪੀ ਜੀ ਦੇ ਮਾਲਕ ਕੇਸਰ ਸਿੰਘ ਨੇ ਕਿਹਾ ਕਿ ਗਮਾਡਾ ਦੀ ਇਹ ਕਾਰਵਾਈ ਗ਼ਲਤ ਹੈ ਅਤੇ ਗਮਾਡਾ ਨੇ ਜੋ ਨੋਟਿਸ ਉਸ ਦੇ ਪੀ ਜੀ ਵਿੱਚ ਲਾਇਆ ਹੈ ਉਸ ਵਿੱਚ ਕਿਸੇ ਹੋਰ ਦਾ ਨਾਮ ਹੈ । ਉਹਨਾਂ ਕਿਹਾ ਕਿ ਉਹਨਾਂ ਦੇ ਪੀ ਜੀ ਵਿੱਚ 1990 ਦਾ ਬਿਜਲੀ ਮੀਟਰ ਲਗਾ ਹੈ ਉਹ ਵੀ ਬਿਜਲੀ ਵਿਭਾਗ ਵੱਲੋਂ ਕੱਟ ਦਿਤਾ ਗਿਆ। ਉਹਨਾਂ ਕਿਹਾ ਕਿ ਜੇਕਰ ਪੀ ਜੀ ਅਣਅਧਿਕਾਰਤ ਹੈ ਤਾਂ ਜਦੋਂ ਕੋਈ ਵਿਅਕਤੀ ਪੀ ਜੀ ਦੀ ਉਸਾਰੀ ਕਰਦਾ ਹੈ ਤਾਂ ਉਸ ਵੇਲੇ ਉਸਾਰੀ ਨੂੰ ਕਿਉਂ ਨਹੀਂ ਰੋਕਿਆ ਜਾਂਦਾ। ਉਹਨਾਂ ਕਿਹਾ ਕਿ ਜਦੋਂ ਕਿਸੇ ਵਿਅਕਤੀ ਵੱਲੋਂ ਅਦਾਲਤ ਵਿੱਚ ਕੇਸ ਕੀਤਾ ਜਾਂਦਾ ਹੈ ਤੇ ਉਸ ਤੋਂ ਬਾਅਦ ਹੀ ਗਮਾਡਾ ਕਾਰਵਾਈ ਕਰਦਾ ਹੈ।