ਆਬਕਾਰੀ ਅਤੇ ਕਰ ਮੰਤਰੀ ਪੰਜਾਬ, ਸ਼੍ਰੀ ਹਰਪਾਲ ਸਿੰਘ ਚੀਮਾ ਦੇ ਨਿਰਦੇਸ਼ਾਂ 'ਤੇ, ਆਬਕਾਰੀ ਵਿਭਾਗ ਨੇ ਪੰਜਾਬ ਵਿੱਚ ਸ਼ਰਾਬ ਦੀ ਤਸਕਰੀ ਵਿਰੁੱਧ ਆਪਣੀ ਕਾਰਵਾਈ ਤੇਜ਼ ਕਰ ਦਿੱਤੀ ਹੈ। ਚਾਲੂ ਵਿੱਤੀ ਸਾਲ 2025-26 ਦੇ ਪਿਛਲੇ 25 ਦਿਨਾਂ ਦੌਰਾਨ, ਪੰਜਾਬ ਆਬਕਾਰੀ ਐਕਟ ਦੀ ਉਲੰਘਣਾ ਲਈ ਰੋਪੜ ਰੇਂਜ ਵਿੱਚ ਕੁੱਲ 8 (7 ਮੋਹਾਲੀ ਵਿੱਚ ਅਤੇ 1 ਰੋਪੜ ਵਿੱਚ) ਐਫਆਈਆਰ ਦਰਜ ਕੀਤੀਆਂ ਗਈਆਂ ਹਨ।
ਇੱਕ ਵੱਡੀ ਜ਼ਬਤੀ ਕੱਲ੍ਹ ਰਾਤ ਜ਼ੀਰਕਪੁਰ ਵਿੱਚ ਹੋਈ। 23 ਅਪ੍ਰੈਲ, 2025 ਦੀ ਵਿਚਕਾਰਲੀ ਰਾਤ ਦੌਰਾਨ, ਮੋਹਾਲੀ ਆਬਕਾਰੀ ਟੀਮ ਨੇ ਮੋਹਾਲੀ ਜ਼ਿਲ੍ਹਾ ਪੁਲਿਸ (ਪੁਲਿਸ ਸਟੇਸ਼ਨ, ਜ਼ੀਰਕਪੁਰ) ਨਾਲ ਇੱਕ ਸਾਂਝੇ ਆਪ੍ਰੇਸ਼ਨ ਵਿੱਚ ਚੰਡੀਗੜ੍ਹ ਤੋਂ ਪੰਜਾਬ ਵਿੱਚ ਤਸਕਰੀ ਕਰਦੇ ਸਮੇਂ ਚੰਡੀਗੜ੍ਹ ਵਿੱਚ ਵੇਚੀ ਜਾਣ ਵਾਲੀ ਸ਼ਰਾਬ ਦੇ 220 ਡੱਬੇ (2640 ਬੋਤਲਾਂ) ਜ਼ਬਤ ਕੀਤੇ। ਸ਼ਰਾਬ ਮਹਿੰਦਰਾ ਪਿਕਅੱਪ ਨੰਬਰ ਪੀਬੀ 05 ਏਆਰ 7403 ਵਿੱਚ ਲੋਡ ਕੀਤੀ ਗਈ ਸੀ। ਮੁਲਜ਼ਮਾਂ ਵਿਰੁੱਧ ਐਫਆਈਆਰ ਨੰਬਰ 187/2025 ਦਰਜ ਕੀਤੀ ਗਈ ਹੈ।
ਚੰਡੀਗੜ੍ਹ ਵਿੱਚ ਹੀ ਵਿਕਰੀ ਕੀਤੀ ਜਾ ਸਕਦੀ ਸ਼ਰਾਬ ਦੀ ਤਸਕਰੀ ਦੇ ਹੋਰ ਮਾਮਲਿਆਂ ਵਿੱਚ,
ਐਫਆਈਆਰ ਨੰਬਰ 90/12.04.2025 (ਸੋਹਾਣਾ): ਦੋਸ਼ੀ ਅਨਿਲ ਕੁਮਾਰ ਮੱਕੜ - 36 ਬੋਤਲਾਂ ਜ਼ਬਤ ਕੀਤੀਆਂ ਗਈਆਂ।
ਐਫਆਈਆਰ ਨੰਬਰ 96/12.04.2025 (ਫੇਸ-1): ਦੋਸ਼ੀ ਭੁਪਿੰਦਰ ਪ੍ਰਸ਼ਾਦ - 16 ਬੋਤਲਾਂ ਜ਼ਬਤ ਕੀਤੀਆਂ ਗਈਆਂ।
ਐਫਆਈਆਰ ਨੰਬਰ 98/18.04.2025 (ਸੋਹਾਣਾ): ਦੋਸ਼ੀ ਲਖਵਿੰਦਰ ਸਿੰਘ - 276 ਬੋਤਲਾਂ ਜ਼ਬਤ ਕੀਤੀਆਂ ਗਈਆਂ।
ਐਫਆਈਆਰ ਨੰਬਰ 35/21.04.2025 (ਨਯਾਗਾਓਂ): ਦੋਸ਼ੀ ਚੇਤ ਰਾਮ - 24 ਬੋਤਲਾਂ ਜ਼ਬਤ ਕੀਤੀਆਂ ਗਈਆਂ।
ਇਸ ਤੋਂ ਇਲਾਵਾ, 23.04.2025 ਨੂੰ ਪਿੰਡ ਸੋਤਲ ਬਾਬਾ (ਜ਼ਿਲ੍ਹਾ ਰੋਪੜ) ਵਿੱਚ ਇੱਕ ਗੁਪਤ ਸੂਚਨਾ ਦੇ ਆਧਾਰ 'ਤੇ ਆਦਤਨ ਅਪਰਾਧੀ ਸਾਹਿਲ ਕੁਮਾਰ ਦੇ ਘਰ ਛਾਪਾ ਮਾਰਿਆ ਗਿਆ, ਜਿੱਥੇ ਚੰਡੀਗੜ੍ਹ ਵਿੱਚ ਵਿਕਰੀ ਲਈ ਰੱਖੀਆਂ ਗਈਆਂ 138 ਬੋਤਲਾਂ ਬਰਾਮਦ ਕੀਤੀਆਂ ਗਈਆਂ। ਮੁਲਜ਼ਮ ਸਾਹਿਲ ਕੁਮਾਰ ਅਤੇ ਸ਼ਿਮਲਾ ਦੇਵੀ ਵਿਰੁੱਧ ਪੁਲਿਸ ਸਟੇਸ਼ਨ ਸਿੰਘ ਭਵਨਤਪੁਰਾ ਜ਼ਿਲ੍ਹਾ ਰੋਪੜ ਵਿਖੇ ਐਫਆਈਆਰ ਨੰਬਰ 43/23.04.2025 ਦਰਜ ਕੀਤੀ ਗਈ ਹੈ।
ਉਪਰੋਕਤ ਮਾਮਲਿਆਂ ਤੋਂ ਇਲਾਵਾ, ਪੰਜਾਬ ਆਬਕਾਰੀ ਐਕਟ ਦੀ ਧਾਰਾ 68-1-64 ਤਹਿਤ ਅਣਅਧਿਕਾਰਤ ਬਾਰ/ਸ਼ਰਾਬ ਸੇਵਨ ਕਰਵਾਉਣ ਦੇ 2 ਮਾਮਲੇ ਦਰਜ ਕੀਤੇ ਗਏ ਹਨ। ਮੁਲਜ਼ਮ ਰਮਨ (ਟੀਡੀਆਈ ਵਿਖੇ ਰੁਤਬਾ), ਅੰਮ੍ਰਿਤ ਸ਼ਰਮਾ (ਦ ਬੌਸ, ਨੇੜੇ ਹੋਟਲ ਪਾਰਕ ਗੇਟ ) ਵਿਰੁੱਧ ਐਫਆਈਆਰ ਨੰਬਰ 87/20.04.2025 ਅਤੇ ਰੈਸਟੋਰੈਂਟ ਸ਼ੂਟ ਐਟ ਸਾਈਟ ਸੈਕਟਰ 86, ਮੋਹਾਲੀ ਦੇ ਮਾਲਕ ਵਿਰੁੱਧ ਐਫਆਈਆਰ ਨੰਬਰ 62/12.03.2025 ਦਰਜ ਕੀਤੀ ਗਈ ਹੈ।
ਰੋਪੜ ਰੇਂਜ ਦੇ ਸਹਾਇਕ ਕਮਿਸ਼ਨਰ (ਆਬਕਾਰੀ), ਸ਼੍ਰੀ ਅਸ਼ੋਕ ਚਲਹੋਤਰਾ ਨੇ ਕਿਹਾ ਕਿ ਕਾਰਵਾਈ ਦੇ ਹਿੱਸੇ ਵਜੋਂ, ਗੈਰ-ਕਾਨੂੰਨੀ ਵਿਕਰੀ/ਖਪਤ ਵਾਲੀਆਂ ਥਾਵਾਂ 'ਤੇ ਕਈ ਛਾਪੇ ਮਾਰੇ ਗਏ ਹਨ, ਨਾਲ ਹੀ ਵਾਹਨਾਂ ਦੀ ਵਿਆਪਕ ਜਾਂਚ ਕੀਤੀ ਗਈ ਹੈ। ਗੈਰ-ਕਾਨੂੰਨੀ ਸ਼ਰਾਬ ਗਤੀਵਿਧੀ ਦੇ ਹਾਟ ਸਪੋਟ ਖੇਤਰਾਂ ਦੀ ਨਿਗਰਾਨੀ ਲਈ ਆਬਕਾਰੀ ਇੰਸਪੈਕਟਰਾਂ ਅਤੇ ਫੀਲਡ ਕਰਮਚਾਰੀਆਂ ਦੀਆਂ ਵਿਸ਼ੇਸ਼ ਟੀਮਾਂ ਤਾਇਨਾਤ ਕੀਤੀਆਂ ਗਈਆਂ ਹਨ।
ਇਸ ਤੋਂ ਇਲਾਵਾ, ਉਨ੍ਹਾਂ ਇਹ ਵੀ ਦੱਸਿਆ ਕਿ ਸਾਰੇ ਸ਼ਰਾਬ ਲਾਇਸੈਂਸਧਾਰਕਾਂ ਨੂੰ ਲਾਇਸੈਂਸ ਸ਼ਰਤਾਂ ਦੀ ਪਾਲਣਾ ਕਰਨ ਲਈ ਸਖ਼ਤ ਹਦਾਇਤਾਂ ਜਾਰੀ ਕੀਤੀਆਂ ਗਈਆਂ ਹਨ। ਕਿਸੇ ਥਾਂ ਸ਼ਰਾਬ ਦੀ ਖਪਤ ਅਤੇ ਸੇਵਨ ਕਰਵਾਉਣ ਦੀ ਸਿਰਫ਼ ਵੈਧ ਲਾਇਸੈਂਸਾਂ ਅਧੀਨ ਹੀ ਆਗਿਆ ਹੈ। ਕਿਸੇ ਵੀ ਉਲੰਘਣਾ 'ਤੇ ਸਖ਼ਤ ਸਜ਼ਾਯੋਗ ਕਾਰਵਾਈ ਕੀਤੀ ਜਾਵੇਗੀ। ਟਰਾਂਸਪੋਰਟਰਾਂ ਅਤੇ ਪ੍ਰਚੂਨ ਵਿਕਰੇਤਾਵਾਂ ਨੂੰ ਸਪਲਾਈ ਲੜੀ ਵਿੱਚ ਸ਼ਰਾਬ ਦੀ ਢੋਆ-ਢੁਆਈ ਕਰਦੇ ਸਮੇਂ ਵੈਧ ਪਰਮਿਟ ਰੱਖਣ ਦੇ ਨਿਰਦੇਸ਼ ਦਿੱਤੇ ਗਏ ਹਨ।
RSS FEED