ਡਾਕਟਰ ਰਾਜ ਕੁਮਾਰ ਸਿਵਲ ਸਰਜਨ ਫ਼ਾਜ਼ਿਲਕਾ ਦੀ ਉਚੇਚੀ ਨਿਗਰਾਨੀ ਵਿੱਚ ਡਾਕਟਰ ਰੋਹਿਤ ਗੋਇਲ ਸਹਾਇਕ ਸਿਵਲ ਸਰਜਨ ਦੀ ਦੇਖਰੇਖ ਵਿੱਚ ਸਿਹਤ ਵਿਭਾਗ ਫ਼ਾਜ਼ਿਲਕਾ ਵੱਲੋਂ ਹੜ੍ਹਾਂ ਨੂੰ ਧਿਆਨ ਵਿੱਚ ਰੱਖਦੇ ਹੋਏ ਪਾਣੀ, ਖੁਰਾਕ ਅਤੇ ਕੀੜਿਆਂ ਨਾਲ ਫੈਲਣ ਵਾਲੀਆਂ ਬਿਮਾਰੀਆਂ ਤੋਂ ਬਚਾਅ ਲਈ ਜਰੂਰੀ ਸਲਾਹ ਜਾਰੀ ਕੀਤੀ ਹੈ।
ਇਸ ਸਮੇਂ ਡਾਕਟਰ ਸੁਨੀਤਾ ਕੰਬੋਜ਼ ਜ਼ਿਲ੍ਹਾ ਐਪੀਡਮੈਲੋਜਿਸਟ ਨੇ ਕਿਹਾ ਕਿ ਹੜ੍ਹਾਂ ਦੇ ਪਾਣੀ ਨਾਲ ਸਿੱਧੇ ਸੰਪਰਕ ਵਿੱਚ ਆਉਣ ਤੋਂ ਬਚੋ। ਜਿੱਥੇ ਪਾਣੀ ਖੜ੍ਹਾ ਹੋਵੇ, ਉੱਥੇ ਤੁਰਦਿਆਂ ਸੁਰੱਖਿਅਤ ਜੁੱਤੇ ਪਹਿਨੋ। ਹੱਥਾਂ ਨੂੰ ਸਾਬਣ ਅਤੇ ਪਾਣੀ ਨਾਲ ਵਾਰ—ਵਾਰ ਧੋਵੋ, ਖਾਸ ਕਰਕੇ ਖਾਣ ਤੋਂ ਪਹਿਲਾਂ, ਖਾਣਾ ਪਰੋਸਣ ਤੋਂ ਪਹਿਲਾਂ ਅਤੇ ਸ਼ੌਚ ਜਾਣ ਤੋਂ ਬਾਅਦ। ਖਾਣਾ ਅਤੇ ਪੀਣ ਵਾਲਾ ਪਾਣੀ ਢੱਕ ਕੇ ਰੱਖੋ ਅਤੇ ਹੜ੍ਹ ਦੇ ਪਾਣੀ ਤੋਂ ਬਚਾਅ ਕਰੋ। ਖਾਣੇ ਦੀ ਸੁਰੱਖਿਅਤ ਤਰੀਕੇ ਨਾਲ ਸੰਭਾਲ ਯਕੀਨੀ ਬਣਾਓ।
ਉਹਨਾਂ ਕਿਹਾ ਕਿ ਪਾਣੀ ਰਾਹੀਂ ਫੈਲਣ ਵਾਲੀਆਂ ਬਿਮਾਰੀਆਂ ਤੋਂ ਬਚਾਅ ਲਈ ਸਿਰਫ ਉਬਲਿਆ ਹੋਇਆ ਜਾਂ ਕਲੋਰੀਨ ਯੁਕਤ ਪਾਣੀ ਪੀਓ। ਜਿੱਥੇ ਪਾਣੀ ਉਬਾਲਣਾ ਸੰਭਵ ਨਾ ਹੋਵੇ, ਉੱਥੇ ਕਲੋਰਿਨ ਗੋਲੀ ਵਰਤੋ। ਕਲੋਰੀਨ ਦੀ ਇੱਕ ਗੋਲੀ 20 ਲੀਟਰ ਪਾਣੀ ਵਿੱਚ 2 ਘੰਟੇ ਤੱਕ ਪਾ ਕੇ ਰੱਖੋ। ਉਸ ਤੋਂ ਬਾਅਦ ਇਸ ਪਾਣੀ ਨੂੰ ਪੀਣ ਲਈ ਵਰਤੋਂ ਵਿੱਚ ਲਿਆਂਦਾ ਜਾਵੇ। ਪਾਣੀ ਸਾਫ਼ ਅਤੇ ਢੱਕੇ ਬਰਤਨਾਂ ਵਿੱਚ ਸੰਭਾਲ ਕੇ ਰੱਖੋ। ਸਬਜ਼ੀਆਂ ਅਤੇ ਫ਼ਲ ਸਾਫ਼ ਪਾਣੀ ਨਾਲ ਧੋਵੋ। ਹੜ੍ਹ ਦੇ ਪਾਣੀ ਨਾਲ ਸੰਪਰਕ ਵਾਲੇ ਭੋਜਨ ਨੂੰ ਨਾ ਖਾਓ।
ਉਹਨਾਂ ਕਿਹਾ ਕਿ ਕੀੜਿਆਂ ਰਾਹੀਂ ਫੈਲਣ ਵਾਲੀਆਂ ਬਿਮਾਰੀਆਂ ਤੋਂ ਬਚਾਅ ਲਈ ਬਰਤਨਾਂ, ਟਾਇਰਾਂ, ਛੱਤਾਂ, ਖੱਡਿਆਂ ਅਤੇ ਕੂਲਰਾਂ ਵਿਚਲਾ ਖੜ੍ਹਾ ਪਾਣੀ ਕੱਢ ਦਿਓ। ਟੈਂਕੀਆਂ ਅਤੇ ਪਾਣੀ ਵਾਲੇ ਬਰਤਨ ਢੱਕ ਕੇ ਰੱਖੋ। ਖਾਸ ਕਰਕੇ ਬੱਚਿਆਂ ਅਤੇ ਗਰਭਵਤੀ ਔਰਤਾਂ ਲਈ ਮੱਛਰਦਾਨੀਆਂ ਵਰਤੋ। ਲੰਮੀ ਬਾਂਹਾਂ ਵਾਲੇ ਕੱਪੜੇ ਪਹਿਨੋ। ਹੜ੍ਹ ਪ੍ਰਭਾਵਿਤ ਖੇਤਰਾਂ ਵਿੱਚ ਫਾਗਿੰਗ/ਸਪਰੇਅ ਕਰਵਾਓ।
ਸੱਪ ਦੇ ਡੰਗ ਤੋਂ ਬਚਾਅ ਲਈ ਪਾਣੀ ਨਾਲ ਭਰੇ ਜਾਂ ਝਾੜੀਆਂ ਵਾਲੇ ਖੇਤਰਾਂ ਵਿੱਚ ਹਨੇਰੇ ਤੋਂ ਬਾਅਦ ਨਾ ਜਾਓ। ਹੱਥਾਂ ਅਤੇ ਪੈਰਾਂ ਨੂੰ ਖੁੱਡਾਂ ਜਾਂ ਸੰਘਣੇ ਘਾਹ ਵਿੱਚ ਨਾ ਪਾਓ।
ਉਹਨਾਂ ਕਿਹਾ ਕਿ ਚਮੜੀ ਦੀ ਐਲਰਜੀ, ਇਨਫੈਕਸ਼ਨ ਅਤੇ ਫੰਗਸ ਤੋਂ ਬਚਾਅ ਲਈ ਹੜ੍ਹ ਦੇ ਪਾਣੀ ਨਾਲ ਲੰਮੇ ਸਮੇਂ ਲਈ ਸੰਪਰਕ ਕਰਨ ਤੋਂ ਬਚੋ। ਜਿੰਨੀ ਜਲਦੀ ਹੋ ਸਕੇ ਸੁੱਕੇ ਕੱਪੜੇ ਪਹਿਨੋ। ਹੜ੍ਹ ਦੇ ਪਾਣੀ ਨਾਲ ਸੰਪਰਕ ਤੋਂ ਬਾਅਦ ਸਾਫ਼ ਪਾਣੀ ਅਤੇ ਸਾਬਣ ਨਾਲ ਨਹਾਓ। ਖਾਰਿਸ਼, ਲਾਲੀ ਜਾਂ ਦਾਣਿਆਂ ਦੇ ਮਾਮਲੇ ਵਿੱਚ ਡਾਕਟਰ ਦੀ ਸਲਾਹ ਨਾਲ ਐਂਟੀਸੈਪਟਿਕ ਜਾਂ ਐਂਟੀਫੰਗਲ ਪਾਊਡਰ/ਮੱਲਮ ਵਰਤੋ। ਰਾਹਤ ਕੈਂਪਾਂ ਵਿੱਚ ਤੌਲੀਆ, ਕੱਪੜੇ ਜਾਂ ਬਿਸਤਰਾ ਸਾਂਝਾ ਨਾ ਕਰੋ। ਜੇ ਛਾਲੇ, ਦਾਣੇ ਜਾਂ ਹੋਰ ਇਨਫੈਕਸ਼ਨ ਹੋਣ ਤਾਂ ਤੁਰੰਤ ਸਿਹਤ ਕੇਂਦਰ ਜਾਂ ਹਸਪਤਾਲ ਜਾਓ।
ਉਹਨਾਂ ਦੱਸਿਆ ਕਿ ਦਸਤਾਂ ਦੀ ਪਹਿਲੀ ਨਿਸ਼ਾਨੀ ’ਤੇ ਹੀ ਓ.ਆਰ.ਐਸ. ਸ਼ੁਰੂ ਕਰੋ ਅਤੇ ਨੇੜਲੇ ਸਿਹਤ ਕੇਂਦਰ ਜਾਓ।
Powered by Froala Editor
Jagrati Lahar is an English, Hindi and Punjabi language news paper as well as web portal. Since its launch, Jagrati Lahar has created a niche for itself for true and fast reporting among its readers in India.
Gautam Jalandhari (Editor)
RSS FEED