ਪਿੰਡ ਹਸਨਪੁਰ ਵਿਖੇ ਐੱਨਆਰਆਈ ਦੇ ਘਰ ਵੱਡੀ ਚੋਰੀ ਪੇਕੇ ਗਈ ਘਰ ਮਾਲਕਣ ਦੇ ਪਿੱਛੋਂ ਚੋਰਾਂ ਨੇ ਤਾਲ੍ਹੇ ਤੋਡ਼ 5 ਲੱਖ ਰੁਪਏ ਨਕਦ ਤੇ 15 ਤੋਲਾ ਸੋਨਾ ਚੋਰੀ ਕੀਤਾ

Jun7,2023 | Ravinder Singh Dhillon | Machiwara

ਮਾਛੀਵਾਡ਼ਾ ਬਲਾਕ ਅਧੀਨ ਪੈਂਦੇ ਪਿੰਡ ਹਸਨਪੁਰ ਵਿਖੇ ਚੋਰਾਂ ਨੇ ਇੱਕ ਐੱਨਆਰਆਈ ਦੀ ਕੋਠੀ ਨੂੰ ਨਿਸ਼ਾਨਾ ਬਣਾਉਂਦਿਆਂ ਉਸ ਚੋਂ 5 ਲੱਖ ਰੁਪਏ ਨਕਦੀ ਅਤੇ 15 ਤੋਲਾ ਸੋਨਾ ਚੋਰੀ ਕਰਕੇ ਵੱਡੀ ਘਟਨਾ ਨੂੰ ਅੰਜ਼ਾਮ ਦਿੱਤਾ। ਘਰ ਦੀ ਮਾਲਕ ਸੁਰਿੰਦਰ ਕੌਰ ਪਤਨੀ ਸਵ. ਸਰਦਾਰ ਸਿੰਘ ਵਾਸੀ ਹਸਨਪੁਰ ਨੇ ਦੱਸਿਆ ਕਿ ਉਹ ਪਰਿਵਾਰ ਸਮੇਤ ਇਟਲੀ ਰਹਿੰਦੀ ਹੈ ਜੋ ਕਿ 5 ਮਹੀਨੇ ਹੀ ਆਪਣੇ ਘਰ ਆਈ ਸੀ। ਘਰ ਮਾਲਕਣ ਅਨੁਸਾਰ ਉਹ 29 ਮਈ ਨੂੰ ਆਪਣੇ ਪੇਕੇ ਘਰ ਲੁਬਾਣਗਡ਼੍ਹ ਚਲੀ ਗਈ ਅਤੇ ਅੱਜ ਜਦੋਂ ਵਾਪਸ ਪਰਤੀ ਤਾਂ ਦੇਖਿਆ ਕਿ ਕੋਠੀ ਦੇ ਸਾਰੇ ਤਾਲ੍ਹੇ ਟੁੱਟੇ ਹੋਏ ਸਨ ਅਤੇ ਘਰ ਦਾ ਸਾਰਾ ਸਮਾਨ ਬਿਖਰਿਆ ਪਿਆ ਸੀ। ਸੁਰਿੰਦਰ ਕੌਰ ਨੇ ਪੱਤਰਕਾਰਾਂ ਨੂੰ ਦੱਸਿਆ ਕਿ ਉਸਨੇ ਕੁਝ ਦਿਨ ਪਹਿਲਾਂ ਪਾਪੂਲਰ ਵੇਚੇ ਸਨ ਜਿਸ ਦਾ 5 ਲੱਖ ਰੁਪਏ ਘਰ ਵਿਚ ਹੀ ਪਿਆ ਸੀ ਜਿਸ ਨੂੰ ਵੀ ਚੋਰ ਚੋਰੀ ਕਰਕੇ ਲੈ ਗਏ। ਇਸ ਤੋਂ ਇਲਾਵਾ ਘਰ ਦੀ ਅਲਮਾਰੀ ਵਿਚ ਪਿਆ 15 ਤੋਲਾ ਸੋਨਾ ਵੀ ਚੋਰੀ ਹੋ ਚੁੱਕਾ ਸੀ। ਚੋਰਾਂ ਨੇ ਘਰ ਵਿਚ ਪਈਆਂ ਸਾਰੀਆਂ ਅਲਮਾਰੀਆਂ ਅਤੇ ਹੋਰ ਸਮਾਨ ਦੀ ਚੰਗੀ ਤਰ੍ਹਾਂ ਫਰੌਲਾ-ਫਰਾਲੀ ਕੀਤੀ ਅਤੇ ਪੂਰੀ ਤਸੱਲੀ ਨਾਲ ਘਟਨਾ ਨੂੰ ਅੰਜ਼ਾਮ ਦਿੱਤਾ ਜਿਸ ਬਾਰੇ ਪਿੰਡ ਚ ਕਿਸੇ ਨੂੰ ਭਿਨਕ ਵੀ ਨਾ ਲੱਗੀ। ਹੋਰ ਤਾਂ ਹੋਰ ਚੋਰ ਜੋ ਘਰ ਵਿਚ ਛੋਟਾ ਜਿਹਾ ਧਾਰਮਿਕ ਸਥਾਨ ਬਣਿਆ ਹੁੰਦਾ ਹੈ ਉਸ ਅੱਗੇ ਵੀ ਸ਼ਰਧਾ ਨਾਲ ਚਡ਼ਾਏ ਪੈਸੇ ਵੀ ਚੋਰੀ ਕਰਕੇ ਲੈ ਗਏ। ਐੱਨਆਰਆਈ ਦੀ ਕੋਠੀ ਚ ਸੀਸੀਟੀਵੀ ਕੈਮਰੇ ਲੱਗੇ ਹੋਏ ਸਨ ਪਰ ਚੋਰ ਜਾਂਦੇ ਹੋਏ ਡੀਵੀਆਰ ਵੀ ਨਾਲ ਲੈ ਗਏ ਜਿਸ ਕਾਰਨ ਕੋਈ ਸੁਰਾਗ ਨਾ ਪਤਾ ਲੱਗ ਸਕਿਆ। ਘਟਨਾ ਦੀ ਸੂਚਨਾ ਮਿਲਦੇ ਹੀ ਸਮਰਾਲਾ ਦੇ ਡੀਐੱਸਪੀ ਵਰਿਆਮ ਸਿੰਘ ਅਤੇ ਬਹਿਲੋਲਪੁਰ ਚੌਂਕੀ ਇੰਚਾਰਜ਼ ਪ੍ਰਮੋਦ ਕੁਮਾਰ ਵੀ ਮੌਕੇ ਤੇ ਪਹੁੰਚ ਗਏ ਜਿਨ੍ਹਾਂ ਵਲੋਂ ਸਾਰੀ ਸਥਿਤੀ ਦਾ ਜਾਇਜ਼ਾ ਲਿਆ ਗਿਆ।

Theft-In-Nri-House-Machiwara-