ਮੋਹਾਲੀ,22 ਜੁਲਾਈ (ਗੁਰਵਿੰਦਰ ਸਿੰਘ) ਮੋਹਾਲੀ ਪੁਲਿਸ ਨੇ ਅਪੋਲੋ ਡਾਈਨੋਸੀਸ ਹਸਪਤਾਲ ਡੇਰਾਬੱਸੀ ਦੇ ਬਾਹਰ ਹਵਾਈ ਫਾਇਰ ਕਰਨ ਵਾਲੇ ਤਿੰਨ ਨੌਜਵਾਨਾਂ ਨੂੰ ਕਾਬੂ ਕਰਕੇ ਉਹਨਾਂ ਤੋਂ ਨਾਜਾਇਜ ਅਸਲਾ ਬਰਾਮਦ ਕੀਤਾ ਹੈ। ਇਸ ਸਬੰਧੀ ਜਾਣਕਾਰੀ ਦਿੰਦਿਆਂ ਐਸ ਐਸ ਪੀ ਡਾ. ਸੰਦੀਪ ਕੁਮਾਰ ਗਰਗ ਨੇ ਦਸਿਆ ਕਿ 20 ਜੁਲਾਈ 2024 ਨੂੰ ਉਸ਼ਾ ਰਾਣੀ ਪਤਨੀ ਸ਼ਿਵ ਕੁਮਾਰਾ ਵਾਸੀ ਰੌਣੀ ਮੁਹੱਲਾ ਡੇਰਾਬੱਸੀ, ਜੋ ਅਪੋਲੋ ਡਾਈਨੋਸੀਸ ਹਸਪਤਾਲ ਡੇਰਾਬੱਸੀ ਵਿਖੇ ਨੌਕਰੀ ਕਰਦੀ ਹੈ, ਆਪਣੀ ਡਿਊਟੀ ਤੇ ਹਾਜਰ ਸਲ ਤਾਂ ਅਚਾਨਕ ਦੋ ਨੌਜਵਾਨ ਲੜਕੇ ਅੰਦਰ ਆਏ, ਜਿਹਨਾਂ ਨੇ ਆਪਣੇ ਮੂੰਹ ਤੇ ਸਿਰ ਤੇ ਚਿੱਟੇ ਰੰਗ ਦੇ ਪਰਨੇ ਬੰਨੇ ਹੋਏ ਸੀ ਅਤੇ ਉਸ ਨੂੰ ਇੱਕ ਪਰਚੀ ਦਿੱਤੀ, ਜਿਸ ਵਿੱਚ ਹਿੰਦੀ ਭਾਸ਼ਾ ਵਿੱਚ ਲਿਖਿਆ ਹੋਇਆ ਸੀ ‘‘ ਹਮ ਕੌਸਲ ਚੌਧਰੀ ਗੈਂਗ ਦੀ ਤਰਫ ਸੇ ਹੈਂ ਓਰ ਉਨ ਕੇ ਕਹਿਨੇ ਪਰ ਯਹ ਕਾਮ ਕੀਯਾ ਗਯਾ ਹੈ ਅਗਰ ਆਪ ਆਪਣੀ ਸਲਾਮਤੀ ਚਾਹਤੇ ਹੋ ਤੋ ਦਿਯੇ ਗਏ ਨੰਬਰ ਪਰ ਵਟੱਸਐਪ ਕਾਲ ਦੁਵਾਰਾ ਬਾਤ ਕਰੋ। ਨਹੀਂ ਤੋ ਆਜ ਏਕ ਗੋਲੀ ਚਲੀ ਹੈ ਕਲ 101 ਗੋਲੀਆ ਚਲੇਗੀ ਇਸ ਕੋ ਮਜਾਕ ਨਾ ਸਮਝੋ। ’’ ਬਾਹਰ ਨਿਕਲ ਕੇ ਉਹਨਾਂ ਵਿਚੋਂ ਇੱਕ ਨੌਜਵਾਨ ਨੇ ਪਿਸਤੌਲ ਕੱਢ ਕੇ ਹਵਾਈ ਫਾਇਰ ਕੀਤਾ ਤੇ ਫਿਰ ਉਕਤ ਤਿੰਨੇ ਨੌਜਵਾਨ ਮੋਟਰਸਾਈਕਲ ਤੇ ਸਵਾਰ ਹੋ ਕੇ ਫਰਾਰ ਹੋ ਗਏ।
ਉਹਨਾਂ ਦਸਿਆ ਕਿ ਇਸ ਸਬੰਧੀ ਨਾ ਮਾਲੂਮ ਦੋਸ਼ੀਆਨ ਵਿਰੁੱਧ ਮੁਕਦਮਾ ਨੰਬਰ 237 ਬੀ.ਐਨ. ਐਸ. ਦੀ ਧਾਰਾ 125,351(2) 351(3) ਅਤੇ ਅਸਲਾ ਐਕਟ ਦੀ ਧਾਰਾ 25-54-59 ਅਧੀਨ ਥਾਣਾ ਡੇਰਾਬੱਸੀ ਦਰਜ ਕੀਤਾ ਗਿਆ ਸੀ। ਇਸ ਸਬੰਧੀ ਐਸ ਪੀ ਜੋਤੀ ਯਾਦਵ, ਡੀ ਐਸ ਪੀ ਤਫਤੀਸ ਹਰਸਿਮਰਤ ਸਿੰਘ, ਇੰਸਪੈਕਟਰ ਹਰਮਿੰਦਰ ਸਿੰਘ ਇੰਚਾਰਜ ਸੀ ਆਈ ਏ ਸਟਾਫ ਦੀ ਨਿਗਰਾਨੀ ਵਿੱਚ ਵੱਖ ਵੱਖ ਟੀਮਾਂ ਦਾ ਗਠਨ ਕੀਤਾ ਗਿਆ ਸੀ। ਉਕਤ ਟੀਮਾਂ ਵਲੋਂ ਮੁਕਦਮਾ ਵਿੱਚ ਟੈਕਨੀਕਲ ਅਤੇ ਮਨੁਖੀ ਸੋਰਸਾਂ ਦੀ ਸਹਾਇਤਾ ਨਾਲ 3 ਨੌਜਵਾਨਾਂ ਨੂੰ ਇੱਕ ਰਿਵਾਲਵਰ .32 ਬੋਰ ਦੇਸੀ, ਮੌਕੇ ਤੇ ਚਲਿਆ ਖੋਲ ਕਾਰਤੂਸ,.32 ਬੋਰ ਅਤੇ 2 ਜਿੰਦਾ ਕਾਰਤੂਸ ਸਮੇਤ ਕਾਬੂ ਕੀਤਾ ਗਿਆ।
ਉਹਨਾਂ ਦਸਿਆ ਕਿ ਤਿੰਨੇ ਨੌਜਵਾਨ ਡੇਰਾਬੱਸੀ ਦੇ ਰਹਿਣ ਵਾਲੇ ਹਨ, ਜਿਹਨਾਂ ਦਾ ਸਬੰਧੀ ਗੈਂਗਸਟਰ ਕੌਸਲ ਚੌਧਰੀ ਗਰੁਪ ਨਾਲ ਪਾਇਆ ਗਿਆ ਹੈ। ਇਹਨਾਂ ਵਿਚੋਂ ਇੱਕ ਨੌਜਵਾਨ ਵਿਰੁਧ ਪਹਿਲਾਂ ਵੀ ਥਾਣਾ ਡੇਰਾਬੱਸੀ ਵਿਖੇ ਇਕ ਮੁਕਦਮਾ ਦਰਜ ਹੈ ਜਿਸ ਵਿੱਚ ਉਹ ਬਾਲ ਸੁਧਾਰ ਘਰ ਹੁਸ਼ਿਆਰਪੁਰ ਵਿਖੇ ਰਹਿ ਕੇ ਆਇਆ ਹੈ। ਇਹਨਾਂ ਤਿੰਨੇ ਦੋਸ਼ੀਆਂ ਨੇ 6.12.2023 ਨੂੰ ਮੋਟਰਾਸਾਈਕਲਾਂ ਤੇ ਸਵਾਰ ਹੋ ਕੇ ਸਿਰ ਅਤੇ ਮੂੰਹ ਬੰਨ ਕੇ ਪੰਜਾਬੀ ਬਾਗ ਨੇੜੈ ਵਾਲੀਵੂਡ ਗਰਾਉਂਡ ਡੇਰਾਬੱਸੀ ਵਿਚ ਚੱਲ ਰਹੇ ਵਿਆਹ ਸਮਾਗਮ ਦੇ ਨਾਲ ਖਾਲੀ ਪਲਾਟ ਵਿੱਚ ਸਾਹਿਲ ਵਾਸੀ ਡੇਰਾਬੱਸੀ ਅਤੇ ਉਸ ਦੇ ਸਾਥੀਆਂ ਨੂੰ ਮਾਰ ਦੇਣ ਦੀ ਨੀਯਤ ਨਾਲ ਉਹਨਾਂ ਤੇ ਫਾਇਰ ਕੀਤੇ ਸਨ। ਉਹਨਾਂ ਦਸਿਆ ਕਿ ਮਾਮਲੇ ਦੀ ਜਾਂਚ ਜਾਰੀ ਹੈ ਅਤੇ ਹੋਰ ਵੀ ਅਹਿਮ ਖੁਲਾਸੇ ਹੋਣ ਦੀ ਉਮੀਦ ਹੈ।