ਕੇਂਦਰੀ ਖੁਰਾਕ ਮੰਤਰਾਲੇ ਦੀ ਟੀਮ ਨੇ ਕੀਤਾ ਜਗਰਾਓਂ ਮੰਡੀ ਦਾ ਦੌਰਾ, ਲਏ ਸੈਂਪਲ

ਪੰਜਾਬ ’ਚ ਲਗਾਤਾਰ ਹੋ ਰਹੀ ਮੌਸਮੀ ਤਬਦੀਲੀ ਦੇ ਕਾਰਨ ਕਣਕ ਦੀ ਫਸਲ ਦੀ ਗੁਣਵੱਤਤਾ ਵਿਚ ਆ ਰਹੀ ਗਿਰਾਵਟ ਨੂੰ ਕਾਰਨ ਮੰਡੀਆਂ ’ਚ ਕਿਸਾਨਾਂ ਨੂੰ ਕਣਕ ਵੇਚਣ ’ਚ ਕਾਫੀ ਮੁਸ਼ਕਲਾਂ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ । ਏਸੀਆ ਦੀ ਦੂਜੀ ਸਭ ਤੋਂ ਵੱਡੀ ਜਗਰਾਓਂ ਅਨਾਜ ਮੰਡੀ ’ਚ ਹੁਣ ਤੱਕ ਕਣਕ ਦੀ ਖ਼ਰੀਦ ਨਾਮਾਤਰ ਹੈ ,ਪਰ ਮੰਡੀਆਂ ’ਚ ਕਿਸਾਨਾਂ ਵੱਲੋਂ ਵੇਚਣ ਲਈ ਲਿਆਦੀਆਂ ਕਣਕ ਦੀਆਂ ਢੇਰੀਆਂ ਚਾਰੇ ਪਾਸੇ ਨਜ਼ਰ ਆ ਰਹੀ ਹਨ । ਜਿਸਨੂੰ ਲੈ ਕੇ ਮੰਗਲਵਾਰ ਨੂੰ ਜਗਰਾਉਂ ਅਨਾਜ ਮੰਡੀ ’ਚ ਕੇਂਦਰੀ ਖੁਰਾਕ ਮੰਤਰਾਲੇ ਦੀ ਟੀਮ ਵੱਲੋਂ ਕਣਕ ਦੇ ਸੈਂਪਲ ਭਰੇ ਗਏ । ਭਾਰਤ ਸਰਕਾਰ ਖੁਰਾਕ ਸਪਲਾਈ ਮੰਤਰਾਲੇ ਦੇ ਸਹਾਇਕ ਡਾਇਰੈਕਟਰ ਆਸੂਤੋਸ਼ ਦੀ ਅਗਵਾਈ ’ਚ ਆਈ ਕੇਂਦਰ ਦੀ ਟੀਮ ਵੱਲੋਂ ਜਗਰਾਉਂ ਮੰਡੀ ’ਚ ਕਣਕ ਦੀਆਂ ਢੇਰੀਆਂ ਦਾ ਨਿਰੀਖਣ ਕੀਤਾ ਗਿਆ ਅਤੇ ਵੱਖ ਵੱਖ ਕਿਸਾਨਾਂ ਦੀਆਂ ਕਣਕ ਦੀਆਂ ਢੇਰੀਆਂ ’ਚੋਂ 5 ਸੈਂਪਲ ਭਰੇ ਗਏ । ਇਸ ਮੌਕੇ ਐਂਫ ਸੀ ਆਈ ,ਫੂਡ ਸਪਲਾਈ ਅਤੇ ਮਾਰਕਫੈਂਡ ਦੇ ਜਿਲ੍ਹਾ ਅਤੇ ਜਗਰਾਉਂ ਦੇ ਅਧਿਕਾਰੀ ਕੇਂਦਰੀ ਟੀਮ ਦੇ ਨਾਲ ਸਨ । ਇਸ ਮੌਕੇ ਕੇਂਦਰੀ ਖੁਰਾਕ ਮੰਤਰਾਲੇ ਦੇ ਅਧਿਕਾਰੀ ਨੇ ਕਿਹਾ ਕਿ ਵਿਭਾਗ ਦੇ ਹੁਕਮਾਂ ਅਨੁਸਾਰ ਸੂਬੇ ਭਰ ਦੀਆਂ ਪ੍ਰਮੁੱਖ ਅਨਾਜ ਮੰਡੀਆਂ ’ਚੋ ਕਣਕ ਦੇ ਸੈਂਪਲ ਇਕੱਤਰ ਕੀਤੇ ਜਾ ਰਹੇ ਹਨ । ਜਿਨ੍ਹਾਂ ਦੀ ਜਾਂਚ ਤੋਂ ਬਾਅਦ ਹੀ ਉਹ ਕਣਕ ਦੀ ਗੁਣਵਤਾ ਸਬੰਧੀ ਗੱਲ ਕਰ ਸਕਦੇ ਹਨ । ਪਰ ਉਨ੍ਹਾਂ ਕਿਹਾ ਕਿ ਇਸ ਵਾਰ ਕਣਕ ਦਾ ਦਾਣਾ ਬਰੀਕ ਅਤੇ ਕੁਝ ਬਦਰੰਗ ਨਜ਼ਰ ਆ ਰਿਹਾ ਹੈ । ਜਿਸਦੀ ਸਾਰੀ ਰਿਪੋਰਟ ਉਹ ਵਿਭਾਗ ਨੂੰ ਸੌਪਣਗੇ ।