ਬੁੱਢੇ ਦਰਿਆ ਵਿਚ ਆਏ ਹਡ਼੍ਹ ਦੇ ਪਾਣੀ ਚ ਰੁਡ਼ੇ ਨਾਬਾਲਗ ਦੀ ਲਾਸ਼ ਮਿਲੀ, ਬਜ਼ੁਰਗ ਦਾਦਾ-ਦਾਦੀ ਤੇ ਟੁੱਟਿਆਂ ਦੁੱਖਾਂ ਦਾ ਕਹਿਰ

Jul13,2023 | Ravinder Singh Dhillon | Machhiwara (ludhiana)

ਮਾਛੀਵਾੜਾ ਸਾਹਿਬ ਨੇਡ਼੍ਹਲੇ ਪਿੰਡ ਮਾਣੇਵਾਲ ਵਿਖੇ ਬੁੱਢੇ ਦਰਿਆ ਵਿਚ ਆਏ ਹਡ਼੍ਹ ਦੇ ਪਾਣੀ ਵਿਚ ਰੁਡ਼ੇ ਨਾਬਾਲਗ ਲਡ਼ਕਾ ਸੁਖਪ੍ਰੀਤ ਸੋਖੀ (16) ਦੀ ਅੱਜ ਲਾਸ਼ ਕੁਝ ਹੀ ਦੂਰੀ ਤੇ ਖੇਤਾਂ ਵਿਚੋਂ ਮਿਲ ਗਈ ਜਿਸ ਕਾਰਨ ਉਸਦਾ ਪਾਲਣ-ਪੋਸ਼ਣ ਕਰਨ ਵਾਲੇ ਬਜ਼ੁਰਗ ਦਾਦਾ-ਦਾਦੀ ਤੇ ਦੁੱਖਾਂ ਦਾ ਕਹਿਰ ਟੁੱਟ ਗਿਆ। ਲੰਘੀ 10 ਜੁਲਾਈ ਨੂੰ ਸੁਖਪ੍ਰੀਤ ਮੋਟਰਸਾਈਕਲ ਤੇ ਬੁੱਢੇ ਦਰਿਆ ਨੇਡ਼੍ਹੇ ਓਵਰ ਫਲੋਅ ਹੋ ਕੇ ਸਡ਼ਕ ਤੋਂ ਗੁਜ਼ਰ ਰਹੇ ਪਾਣੀ ਚੋਂ ਲੰਘ ਰਿਹਾ ਜਿਸ ਕਾਰਨ ਉਸਦਾ ਪੈਰ ਫਿਸਲ ਗਿਆ ਅਤੇ ਉਹ ਤੇਜ਼ ਪਾਣੀ ਵਿਚ ਰੁਡ਼ ਗਿਆ। ਬੇਸ਼ੱਕ ਉਸ ਸਮੇਂ ਗੋਤਾਖੋਰਾਂ ਵਲੋਂ ਵੀ ਉਸਦੀ ਪਾਣੀ ਵਿਚ ਤਲਾਸ਼ ਕੀਤੀ ਗਈ ਪਰ ਕੁਝ ਪਤਾ ਨਾ ਲੱਗਿਆ। ਅੱਜ ਪਿੰਡ ਦੇ ਸਾਬਕਾ ਸਰਪੰਚ ਗੁਰਪ੍ਰੀਤ ਸਿੰਘ ਗੋਪੀ ਨੇ ਦੱਸਿਆ ਕਿ ਅੱਜ ਜਦੋਂ ਖੇਤਾਂ ਵਿਚ ਪਾਣੀ ਦਾ ਪੱਧਰ ਘਟਿਆ ਤਾਂ ਇੱਕ ਵਿਅਕਤੀ ਨੇ ਇਸ ਲਡ਼ਕੇ ਦੀ ਲਾਸ਼ ਨੂੰ ਦੇਖਿਆ ਜਿਸ ਤੇ ਤੁਰੰਤ ਉਸ ਨੂੰ ਬਾਹਰ ਕੱਢਿਆ ਗਿਆ। ਸੂਚਨਾ ਮਿਲਦੇ ਹੀ ਪੁਲਸ ਵੀ ਮੌਕੇ ਤੇ ਪਹੁੰਚ ਗਈ ਜਿਨ੍ਹਾਂ ਲਾਸ਼ ਕਬਜ਼ੇ ਚ ਕਰ ਪੋਸਟ ਮਾਰਟਮ ਲਈ ਭਿਜਵਾ ਦਿੱਤਾ ਗਿਆ। ਮ੍ਰਿਤਕ ਪੋਤੇ ਦੀ ਲਾਸ਼ ਦੇਖ ਕੇ ਉਸਦਾ ਦਾਦਾ ਚਰਨ ਦਾਸ ਅਤੇ ਦਾਦੀ ਦਾ ਰੋ-ਰੋ ਕੇ ਬੁਰਾ ਹਾਲ ਸੀ ਜੋ ਉਸ ਮਾਡ਼ੇ ਵਕਤ ਨੂੰ ਕੋਸ ਰਹੇ ਸਨ ਕਿ ਉਨ੍ਹਾਂ ਦਾ ਪੋਤਾ ਤੇਜ਼ ਵਹਾਅ ਵਾਲੇ ਪਾਣੀ ਵਿਚ ਕਿਉਂ ਜਾ ਵਡ਼ਿਆ। ਦਾਦਾ ਚਰਨ ਦਾਸ ਨੇ ਦੱਸਿਆ ਕਿ ਉਸਦੇ ਪੋਤੇ ਸੁਖਪ੍ਰੀਤ ਸੋਖੀ ਦੇ ਪਿਤਾ ਅਤੇ ਉਸਦੇ ਪੁੱਤਰ ਦੀ 4 ਮਹੀਨੇ ਪਹਿਲਾਂ ਮੌਤ ਹੋਈ ਹੈ ਅਤੇ ਉਹ ਅਜੇ ਇਸ ਗਮ ਚੋਂ ਉੱਭਰੇ ਨਹੀਂ ਸਨ ਕਿ ਹੁਣ ਉਨ੍ਹਾਂ ਦਾ ਆਖਰੀ ਸਹਾਰਾ ਵੀ ਵਿਛਡ਼ ਗਿਆ। ਚਰਨ ਦਾਸ ਨੇ ਦੱਸਿਆ ਕਿ ਪੋਤਾ ਸੁਖਪ੍ਰੀਤ ਮਾਛੀਵਾਡ਼ਾ ਵਿਖੇ ਦੁਕਾਨ ਤੇ ਨੌਕਰੀ ਕਰਦਾ ਜਿਸ ਨਾਲ ਪਰਿਵਾਰ ਦਾ ਗੁਜ਼ਾਰਾ ਚੱਲਦਾ ਸੀ ਪਰ ਉਸਦੀ ਮੌਤ ਨਾਲ ਪਰਿਵਾਰ ਦਾ ਪਾਲਣ-ਪੋਸ਼ਣ ਕਰਨਾ ਵੀ ਔਖਾ ਹੋ ਜਾਵੇਗਾ। ਬਜ਼ੁਰਗ ਨੇ ਕਿਹਾ ਕਿ ਉਸ ਨੂੰ ਪ੍ਰਮਾਤਮਾ ਤੇ ਸਰਕਾਰ ਤੇ ਭਰੋਸਾ ਹੈ ਕਿ ਇਸ ਔਖੀ ਘਡ਼ੀ ਵਿਚ ਉਨ੍ਹਾਂ ਦੀ ਸੰਭਵ ਮੱਦਦ ਕਰਨਗੇ। ਮ੍ਰਿਤਕ ਲਡ਼ਕਾ ਸੁਖਪ੍ਰੀਤ ਸੋਖੀ 2 ਭੈਣਾਂ ਦਾ ਇਕਲੌਤਾ ਭਰਾ ਸੀ ਜਦਕਿ ਇੱਕ ਭੈਣ ਉਸ ਕੋਲ ਅਤੇ ਦੂਜੀ ਮਾਤਾ ਨਾਲ ਰਹਿੰਦੀ ਹੈ ਜੋ ਕਿ ਪਰਿਵਾਰ ਤੋਂ ਅਲੱਗ ਸਨ।

Underage-Body-Found-Buddha-Nala-Water-Overflow-Machiwara-