ਮੁਹਾਲੀ ਪੁਲੀਸ ਨੇ ਅਦਾਲਤ ਵਿੱਚ ਮੁਜਰਿਮਾਂ ਦੇ ਫਰਜੀ ਬੇਲ ਬਾਂਡ ਭਰਾਉਣ ਵਾਲੇ ਗਿਰੋਹ ਦਾ ਪਰਦਾਫਾਸ਼ ਕਰਦਿਆਂ 5 ਵਿਅਕਤੀਆਂ ਨੂੰ ਕਾਬੂ ਕੀਤਾ ਹੈ ਜਦੋਂਕਿ ਗਿਰੋਹ ਦੇ ਕੁੱਝ ਹੋਰ ਮੈਂਬਰਾਂ ਹੁਣੇ ਪੁਲੀਸ ਦੀ ਗ੍ਰਿਫਤ ਤੋਂ ਬਾਹਰ ਹਨ। ਡੀ ਐਸ ਪੀ ਸਿਟੀ 2 ਹਰਸਿਮਰਨ ਸਿੰਘ ਬੱਲ ਨੇ ਦੱਸਿਆ ਕਿ ਬੀਤੇ ਦਿਨੀਂ ਸੋਹਾਣਾ ਥਾਣਾ ਵਿੱਚ ਮਾਨਯੋਗ ਐਡੀਸ਼ਨਲ ਸੈਸ਼ਨ ਜੱਜ ਐਸ. ਏ. ਐਸ. ਨਗਰ ਮੁਹਾਲੀ ਦੇ ਹੁਕਮਾਂ ਤੇ ਪੁਲੀਸ ਵਲੋਂ ਅਦਾਲਤ ਵਿਚ ਮੁਜਰਿਮਾਂ ਦੇ ਫਰਜੀ ਬੇਲ ਬਾਂਡ ਭਰਨ ਵਾਲੇ ਵਿਅਕਤੀਆਂ ਦੇ ਖਿਲਾਫ ਆਈ ਪੀ ਸੀ ਦੀ ਧਾਰਾ 419, 420, 465, 467, 468, 471 ਅਤੇ 120-ਬੀ ਤਹਿਤ ਮਾਮਲਾ ਦਰਜ ਕੀਤਾ ਗਿਆ ਸੀ ਜਿਸਤੇ ਕਾਰਵਾਈ ਕਰਦਿਆਂ ਏ. ਐਸ. ਆਈ ਓਮ ਪ੍ਰਕਾਸ਼ ਦੀ ਟੀਮ ਵਲੋਂ ਦੋ ਵਿਅਕਤੀਆਂ ਅਮਰਜੀਤ ਸਿੰਘ ਵਾਸੀ ਮੁਹੱਲਾ ਜੱਟਾ ਵਾਲਾ ਪੁਰਾਣਾ ਰਾਜਪੁਰਾ ਅਤੇ ਸੁਨੀਲ ਗਿਰੀ ਵਾਸੀ ਸੁਲਤਾਨਪੁਰ ਬਰਮੋਰਾ ਬਰੇਲੀ ਉੱਤਰ ਪ੍ਰਦੇਸ਼, (ਹਾਲ ਵਾਸੀ ਨੇੜੇ ਗੁਰਦੁਆਰਾ ਸਾਹਿਬ ਸੰਤੇ ਮਾਜਰਾ ਬਲੌਂਗੀ) ਨੂੰ ਗ੍ਰਿਫਤਾਰ ਕੀਤਾ ਗਿਆ ਸੀ। ਉਹਨਾਂ ਦੱਸਿਆ ਕਿ ਇਹਨਾਂ ਦੋਵਾਂ ਦੀ ਡੂੰਘਾਈ ਨਾਲ ਪੁੱਛਗਿੱਛ ਕੀਤੀ ਗਈ ਜਿਸਤੇ ਪਤਾ ਲੱਗਿਆ ਕਿ ਇਹ ਪੂਰਾ ਗਿਰੋਹ ਹੈ ਜਿਸ ਵਲੋਂ ਵੱਖ ਵੱਖ ਅਦਾਲਤਾਂ ਵਿਚ ਫਰਜੀ ਦਸਤਾਵੇਜ ਪੇਸ਼ ਕਰਕੇ ਮੁਜਰਿਮਾਂ ਦੀ ਜਮਾਨਤ ਭਰ ਕੇ ਰਿਹਾਅ ਕਰਵਾਇਆ ਜਾਂਦਾ ਹੈ। ਉਹਨਾਂ ਦੱਸਿਆ ਕਿ ਪੁੱਛਗਿੱਛ ਤੋਂ ਬਾਅਦ ਇਸ ਮਾਮਲੇ ਵਿੱਚ ਸਿਮਰਨਜੀਤ ਸਿੰਘ ਉਰਫ ਸਿੰਮੀ ਵਾਸੀ ਭਰਤ ਕਲੌਨੀ ਰਾਜਪੁਰਾ ਜਿਲਾ ਪਟਿਆਲਾ, ਜਸਵਿੰਦਰ ਸਿੰਘ ਉਰਫ ਜੱਸੀ ਵਾਸੀ ਗੁਰੂ ਨਾਨਕ ਨਗਰ, ਨਲਾਸ ਰੋਡ, ਰਾਜਪੂਰਾ ਜਿਲਾ ਪਟਿਆਲਾ ਅਤੇ ਸੁਖਵੀਰ ਸਿੰਘ ਵਾਸੀ ਗੁਰੂ ਗੋਬਿੰਦ ਸਿੰਘ ਨਗਰ, ਰਾਜਪੁਰਾ ਪਟਿਆਲਾ ਨੂੰ ਨਾਮਜਦ ਕਰਕੇ ਗ੍ਰਿਫਤਾਰ ਕੀਤਾ ਗਿਆ। ਉਹਨਾਂ ਦੱਸਿਆ ਕਿ ਗੈਂਗ ਦੇ ਮਾਸਟਰ ਮਾਈਂਡ ਵਿਅਕਤੀ ਲੱਕੀ ਵਾਸੀ ਸੰਗਰੂਰ, ਬਿੱਲਾ ਮੁਨਸ਼ੀ ਵਾਸੀ ਮੁਹਾਲੀ, ਸੋਨੂੰ ਵਾਸੀ ਅੰਬਾਲਾ ਅਤੇ ਭਾਗ ਸਿੰਘ ਵਾਸੀ ਡੇਰਾਬੱਸੀ ਨੂੰ ਗ੍ਰਿਫਤਾਰ ਕਰਨਾ ਬਾਕੀ ਹੈ। ਜਿੰਨਾ ਤੋਂ ਕਾਫੀ ਫਰਜੀ ਬੇਲ ਬਾਂਡ ਭਰਾਉਣ ਸਮੇਂ ਵਰਤੇ ਫਰਜੀ ਦਸਤਾਵੇਜ ਬ੍ਰਾਮਦ ਹੋ ਸਕਦੇ ਹਨ।