ਮੋਟਰਸਾਈਕਲ ਖੋਹੇ ਜਾਣ ਦੀ ਝੂਠੀ ਸ਼ਿਕਾਇਤ ਦੇਣ ਵਾਲੇ ਖਿਲਾਫ ਪੁਲੀਸ ਨੇ ਮਾਮਲਾ ਦਰਜ ਕੀਤਾ
ਮੋਹਾਲੀ, 5 ਜੁਲਾਈ (ਗੁਰਵਿੰਦਰ ਸਿੰਘ) ਮੋਹਾਲੀ ਪੁਲੀਸ ਨੇ ਜਤਿੰਦਰ ਪੰਡਿਤ ਨਾਮ ਦੇ ਇੱਕ ਵਿਅਕਤੀ ਦੇ ਖਿਲਾਫ ਬੀ. ਐਨ. ਐਸ. ਦੀ ਧਾਰਾ 217 ਦੇ ਤਹਿਤ ਮਾਮਲਾ ਦਰਜ ਕੀਤਾ ਹੈ। ਇਸ ਸੰਬੰਧੀ ਜਾਣਕਾਰੀ ਦਿੰਦਿਆਂ ਡੀ ਐਸ ਪੀ ਸਿਟੀ 2 ਹਰਸਿਮਰਨ ਸਿੰਘ ਬੱਲ ਨੇ ਦੱਸਿਆ ਕਿ ਇਸ ਵਿਅਕਤੀ ਵਲੋਂ ਬੀਤੀ ਸ਼ਾਮ 7 ਵਜੇ ਦੇ ਕਰੀਬ ਐਮਰਜੈਂਸੀ ਹੈਲਪ ਲਾਇਨ ਨੰਬਰ 112 ਤੇ ਸ਼ਿਕਾਇਤ ਦਿੱਤੀ ਸੀ ਕਿ ਅਣਪਛਾਤੇ ਵਿਅਕਤੀਆਂ ਵੱਲੋਂ ਉਸ ਤੋਂ ਇੱਕ ਲੱਖ ਰੁਪਏ ਨਕਦੀ ਅਤੇ ਮੋਟਰਸਾਇਕਲ ਖੋਹ ਕੀਤੀ ਗਈ ਹੈ। ਉਹਨਾਂ ਦੱਸਿਆ ਕਿ ਇਸ ਸੰਬੰਧੀ ਪੁਲੀਸ ਵੱਲੋਂ ਤੁਰੰਤ ਐਕਸ਼ਨ ਲਿਆ ਗਿਆ ਅਤੇ ਥਾਣਾ ਆਈ ਟੀ ਸਿਟੀ ਦੇ ਇੰਚਾਰਜ ਇੰਸਪੈਕਟਰ ਸਤਵਿੰਦਰ ਸਿੰਘ, ਪੀ. ਸੀ. ਪਾਰਟੀ ਈਕੋ-23 ਤੇ ਤੈਨਾਤ ਏ. ਐਸ. ਆਈ. ਗੁਰਤੇਜ ਸਿੰਘ ਅਤੇ ਡਿਊਟੀ ਅਫਸਰ ਏ.ਐਸ.ਆਈ ਪ੍ਰੇਮ ਚੰਦ ਵਲੋਂ ਮੌਕੇ ਤੇ ਪੁੱਜ ਕੇ ਸ਼ਿਕਾਇਤਕਰਤਾ ਅਤੇ ਆਸ ਪਾਸ ਤੋਂ ਪੁੱਛ ਪੜਤਾਲ ਕੀਤੀ ਗਈ।
ਉਹਨਾਂ ਦੱਸਿਆ ਕਿ ਖੂਫੀਆ ਤੇ ਐਲਾਨੀਆ ਸੋਰਸਾਂ ਤੋਂ ਤਸਦੀਕ ਕਰਨ ਤੇ ਸਾਹਮਣੇ ਆਇਆ ਹੈ ਕਿ ਸ਼ਿਕਾਇਤਕਰਤਾ (ਜੋ ਠੇਕੇਦਾਰੀ ਦਾ ਕੰਮ ਕਰਦਾ ਹੈ) ਦਾ ਦੂਜੀ ਧਿਰ (ਜੋ ਸਰੀਆ ਬੰਨਣ ਦੀ ਲੇਬਰ ਦਾ ਕੰਮ ਕਰਦੇ ਹਨ) ਨਾਲ ਪੈਸੇ ਦੇ ਲੈਣ ਦੇਣ ਸਬੰਧੀ ਆਪਸੀ ਬੋਲ ਬਾਣੀ ਹੋਈ ਸੀ। ਸ਼ਿਕਾਇਤਕਰਤਾ ਨੇ ਉਹਨਾਂ ਕੋਲ ਆਪਣਾ ਮੋਟਰ ਸਾਈਕਲ ਗਿਰਵੀ ਰੱਖਣ ਦੀ ਗੱਲ ਕੀਤੀ ਅਤੇ ਬਾਅਦ ਵਿੱਚ ਝੂਠੀ ਸ਼ਿਕਾਇਤ ਦਰਜ ਕਰਵਾ ਦਿੱਤੀ ਗਈ ਅਤੇ 1 ਲੱਖ ਰੁਪਏ ਖੋਹ ਹੋਣ ਸਬੰਧੀ ਗੱਲ ਵੀ ਝੂਠੀ ਪਾਈ ਗਈ।
ਉਹਨਾਂ ਦੱਸਿਆ ਕਿ ਪੁਲੀਸ ਵਲੋਂ ਝੂਠੀ ਸ਼ਿਕਾਇਤ ਦੇਣ ਵਾਲੇ ਜਤਿੰਦਰ ਪੰਡਿਤ ਵਾਸੀ ਜਿਲਾ ਪੱਛਮੀ ਚੰਪਾਰਨ ਬਿਹਾਰ (ਹਾਲ ਵਾਸ਼ੀ ਕਿਰਾਏਦਾਰ ਪਿੰਡ ਰੁੜਕਾ) ਦੇ ਖਿਲਾਫ ਮਾਮਲਾ ਦਰਜ ਕਰਕੇ ਇਸਤਗਾਸਾ ਇਲਾਕਾ ਮੈਜਿਸਟ੍ਰੇਟ ਦੀ ਮਾਨਯੋਗ ਅਦਾਲਤ ਵਿੱਚ ਦਿੱਤਾ ਜਾ ਰਿਹਾ ਹੈ।
ਉਹਨਾਂ ਦੱਸਿਆ ਕਿ ਕੁਝ ਦਿਨ ਪਹਿਲਾਂ ਵੀ ਹੈਲਪ ਲਾਈਨ ਨੰਬਰ 112 ਤੇ ਝੂਠੀ ਇਤਲਾਹ ਦੇਣ ਸਬੰਧੀ ਥਾਣਾ ਫੇਜ਼-11, ਐਸ.ਏ.ਐਸ ਨਗਰ ਵਿੱਚ ਨਾਹਿਦ ਆਲਮ ਨਾਮ ਦੇ ਵਿਅਕਤੀ ਖਿਲਾਫ ਕਾਨੂੰਨੀ ਕਾਰਵਾਈ ਕੀਤੀ ਗਈ ਸੀ ਅਤੇ ਪੁਲੀਸ ਵਲੋਂ ਅਜਿਹੀਆਂ ਝੂਠੀਆਂ ਇਤਲਾਹਾਂ ਦੇ ਕੇ ਪ੍ਰਸ਼ਾਸ਼ਨ ਦੇ ਸਮੇਂ ਦਾ ਗਲਤ ਇਸਤੇਮਾਲ ਕਰਨ ਵਾਲਿਆਂ ਖਿਲਾਫ ਸਖਤ ਕਾਰਵਾਈ ਕੀਤੀ ਜਾ ਰਹੀ ਹੈ।
RSS FEED