ਮਾਮਲਾ ਕਿਸਾਨਾਂ ਅਤੇ ਟਰੱਕ ਯੂਨੀਅਨ ਆਗੂਆਂ ਚ ਹੋਏ ਟਕਰਾਅ ਦਾ:- ਕਿਸਾਨਾਂ ਨੇ ਪ੍ਰਦਰਸ਼ਨ ਦੌਰਾਨ ਫੂਕਿਆ ਹਲਕਾ ਵਿਧਾਇਕਾ ਦਾ ਪੁਤਲਾ,ਪ੍ਰਸ਼ਾਸਨ ਤੋਂ ਮੰਗੀ ਕਾਰਵਾਈ

Nov20,2022 | Parvinder Jit Singh | Bathinda

ਤਲਵੰਡੀ ਸਾਬੋ 20 ਨਵੰਬਰ (ਪਰਵਿੰਦਰ ਜੀਤ ਸਿੰਘ)

ਗੈਰ ਰਾਜਨੀਤਿਕ ਸੰਯੁਕਤ ਕਿਸਾਨ ਮੋਰਚੇ ਦੇ ਸੱਦੇ ਤੇ ਕਿਸਾਨੀ ਮੰਗਾਂ ਲਈ ਪੰਜਾਬ ਦੇ ਕੁਝ ਹਿੱਸਿਆਂ ਵਾਂਗ ਭਾਕਿਯੂ (ਸਿੱਧੂਪੁਰ) ਵੱਲੋਂ ਤਲਵੰਡੀ ਸਾਬੋ ਦੇ ਥਾਣਾ ਚੌਂਕ ਚ ਲਾਏ ਮੋਰਚੇ ਦੇ ਚੌਥੇ ਦਿਨ ਬੀਤੇ ਕੱਲ ਟਰੱਕ ਯੂਨੀਅਨ ਆਗੂਆਂ ਅਤੇ ਕਿਸਾਨਾਂ ਵਿਚਕਾਰ ਬਣੀ ਟਕਰਾਅ ਦੀ ਸਥਿੱਤੀ ਉਪਰੰਤ ਅੱਜ ਕਿਸਾਨ ਆਗੂਆਂ ਨੇ ਸੱਤਾਧਿਰ ਉੱਪਰ ਕਿਸਾਨੀ ਸੰਘਰਸ਼ ਨੂੰ ਤਾਰਪੀਡੋ ਕਰਨ ਦੇ ਕਥਿਤ ਇਲਜ਼ਾਮ ਲਾਉਦਿਆਂ ਹਲਕਾ ਵਿਧਾਇਕਾ ਪ੍ਰੋ.ਬਲਜਿੰਦਰ ਕੌਰ ਦਾ ਪੁਤਲਾ ਫੂਕਦਿਆਂ ਪੰਜਾਬ ਸਰਕਾਰ ਖਿਲਾਫ ਵੀ ਨਾਅਰੇਬਾਜ਼ੀ ਕਰਦਿਆਂ ਟਰੱਕ ਯੂਨੀਅਨ ਆਗੂ ਖਿਲਾਫ ਕਾਰਵਾਈ ਮੰਗੀ।

ਅੱਜ ਕਿਸਾਨੀ ਪ੍ਰਦਰਸ਼ਨ ਦੇ ਪੰਜਵੇਂ ਦਿਨ ਚ ਦਾਖਿਲ ਹੋਣ ਤੇ ਕਿਸਾਨ ਆਗੂਆਂ ਨੇ ਭਾਕਿਯੂ (ਸਿੱਧੂਪੁਰ) ਦੇ ਜਿਲ੍ਹਾ ਪ੍ਰਧਾਨ ਬਲਦੇਵ ਸਿੰਘ ਸੰਦੋਹਾ ਦੀ ਅਗਵਾਈ ਵਿੱਚ ਹਲਕੇ ਦੀ ‘ਆਪ’ ਵਿਧਾਇਕਾ ਪ੍ਰੋ.ਬਲਜਿੰਦਰ ਕੌਰ ਦਾ ਪੁਤਲਾ ਫੂਕਦਿਆਂ ਪੰਜਾਬ ਸਰਕਾਰ ਅਤੇ ਆਮ ਆਦਮੀ ਪਾਰਟੀ ਖਿਲਾਫ ਜ਼ੋਰਦਾਰ ਨਾਅਰੇਬਾਜ਼ੀ ਕੀਤੀ।ਕਿਸਾਨ ਆਗੂ ਰੇਸ਼ਮ ਸਿੰਘ ਯਾਤਰੀ ਨੇ ਕਿਹਾ ਕਿ ਬੀਤੇ ਕੱਲ ਟਰੱਕ ਯੂਨੀਅਨ ਤਲਵੰਡੀ ਸਾਬੋ ਦੇ ਆਮ ਆਦਮੀ ਪਾਰਟੀ ਵੱਲੋਂ ਥਾਪੇ ਪ੍ਰਧਾਨ ਅਵਤਾਰ ਸਿੰਘ ਜਗਾ ਨੇ ਆਪਣੇ ਕੁਝ ਸਾਥੀਆਂ ਨਾਲ ਆ ਕੇ ਜਿੱਥੇ ਕਿਸਾਨ ਆਗੂਆਂ ਨੂੰ ਧਮਕੀਆਂ ਦਿੰਦਿਆਂ ਧਰਨਾ ਉਠਾ ਲੈਣ ਦੀ ਚਿਤਾਵਨੀ ਦਿੱਤੀ ਉੱਥੇ ਕਿਸਾਨ ਧਰਨੇ ਦੇ ਆਲੇ ਦੁਆਲੇ ਲਾਏ ਬੈਰੀਕੇਡ ਤੱਕ ਚੁੱਕ ਕੇ ਟਰੱਕ ਯੂਨੀਅਨ ਦਫਤਰ ਲੈ ਗਏ ਜਿਸਦੀ ਸੂਚਨਾ ਜਥੇਬੰਦੀ ਨੇ ਡੀ.ਐੱਸ.ਪੀ ਤਲਵੰਡੀ ਸਾਬੋ ਨੂੰ ਦਿੰਦਿਆਂ ਕਾਰਵਾਈ ਦੀ ਮੰਗ ਕੀਤੀ ਹੈ।ਕਿਸਾਨ ਆਗੂਆਂ ਨੇ ਦਾਅਵਾ ਕੀਤਾ ਕਿ ਟਰੱਕ ਯੂਨੀਅਨ ਦਾ ਉਕਤ ਪ੍ਰਧਾਨ ਸੱਤਾਧਿਰ ਦਾ ਆਗੂ ਹੈ ਅਤੇ ਪਿਛਲੇ ਦਿਨੀ ਗੁੰਡਾ ਪਰਚੀ ਲੈਣ ਦੇ ਕਥਿਤ ਦੋਸ਼ਾਂ ਤਹਿਤ ਉਸ ਖਿਲਾਫ ਪਰਚਾ ਵੀ ਹੋਇਆ ਅਤੇ ਉਸਨੇ ਹਲਕਾ ਵਿਧਾਇਕਾ ਦੇ ਇਸ਼ਾਰੇ ਤੇ ਧਰਨਾ ਚੁਕਵਾਉਣ ਦੇ ਮਨੋਰਥ ਨਾਲ ਗੁੰਡਾਗਰਦੀ ਕੀਤੀ ਜਿਸ ਖਿਲਾਫ ਹੁਣ ਪੁਲਿਸ ਨੂੰ ਬਣਦੀ ਕਾਰਵਾਈ ਕਰਨੀ ਚਾਹਿਦੀ ਹੈ।ਉਨਾਂ ਚਿਤਾਵਨੀ ਦਿੱਤੀ ਕਿ ਜੇ ਉਕਤ ਆਗੂ ਖਿਲਾਫ ਕਾਰਵਾਈ ਨਾ ਹੋਈ ਜਾਂ ਪ੍ਰਦਰਸ਼ਨ ਚ ਕੋਈ ਖਲਲ ਪਿਆ ਤਾਂ ਹਲਕਾ ਵਿਧਾਇਕਾ ਦੀ ਕੋਠੀ ਦਾ ਘਿਰਾਉ ਕੀਤਾ ਜਾਵੇਗਾ।

ਕਿਸਾਨ ਆਗੂਆਂ ਮਹਿਮਾ ਸਿੰਘ ਅਤੇ ਯੋਧਾ ਸਿੰਘ ਨੰਗਲਾ ਨੇ ਕਿਹਾ ਕਿ ਪੰਜਾਬ ਸਰਕਾਰ ਵੱਲੋਂ ਮੰਨੀਆਂ ਜਾ ਚੁੱਕੀਆਂ ਕਿਸਾਨੀ ਮੰਗਾਂ ਲਾਗੂ ਨਾ ਕਰਨ ਤੱਕ ਉਕਤ ਸੰਘਰਸ਼ ਜਾਰੀ ਰਹੇਗਾ ਅਤੇ ਖਲਲ ਪਾਉਣ ਦੀ ਕੋਈ ਕਾਰਵਾਈ ਬਰਦਾਸ਼ਤ ਨਹੀ ਕਰਾਂਗੇ।ਇਸ ਮੌਕੇ ਵੱਡੀ ਗਿਣਤੀ ਕਿਸਾਨ ਮੌਜੂਦ ਸਨ।

Bathinda-News-